دوسطری

میں تیرا  حُسن اگر  پُھونک دوں دیواروں پر
شہر کا شہر ، طلسمات میں ڈھل جاۓ گا.......

فضل احمد کریم فضلی

فضل احمد کریم فضلی
غموں سے کھیلتے رہنا کوئی ہنسی بھی نہیں
نہ ہو یہ کھیل تو پھر لطف زندگی بھی نہیں

نہیں کہ دل میں تمنا مرے کوئی بھی نہیں
مگر یہ بات کچھ ایسی کی گفتنی بھی نہیں

ابھی میں کیا اٹھوں نیت ابھی بھری بھی نہیں
ستم یہ اور کہ مے کی ابھی کمی بھی نہیں

ادائیں ان کی سناتی ہیں مجھ کو میری غزل
غزل بھی وہ کہ جو میں نے ابھی کہی بھی نہیں

حضور دوست مرے گو مگو کے عالم نے
کہا بھی ان سے جو کہنا تھا بات کی بھی نہیں

ہمارے ان کے تعلق کا اب یہ عالم ہے
کہ دوستی کا ہے کیا ذکر دشمنی بھی نہیں

کہا جو ترک محبت کو شیخ نے کھلا
فرشتہ تو نہیں لیکن یہ آدمی بھی نہیں

وحید اختر

وحید اختر
دیوانوں کو منزل کا پتا یاد نہیں ہے
جب سے ترا نقش کف پا یاد نہیں ہے
افسردگی عشق کے کھلتے نہیں اسباب
کیا بات بھلا بیٹھے ہیں کیا یاد نہیں ہے
ہم دل زدگاں جیتے ہیں یادوں کے سہارے
ہاں مٹ گئے جس پر وہ ادا یاد نہیں ہے
گھر اپنا تو بھولی ہی تھی آشفتگی دل
خود رفتہ کو اب در بھی ترا یاد نہیں ہے
لیتے ہیں ترا نام ہی یوں جاگتے سوتے
جیسے کہ ہمیں اپنا خدا یاد نہیں ہے
یہ ایک ہی احسان غم دوست ہے کیا کم
بے مہری دوراں کی جفا یاد نہیں ہے
بے برسے گزر جاتے ہیں امڈے ہوئے بادل
جیسے انہیں میرا ہی پتا یاد نہیں ہے
اس بار وحیدؔ آپ کی آنکھیں نہیں برسیں
کیا جھومتی زلفوں کی گھٹا یاد نہیں ہے

دیو منی پانڈے

دیومنی پانڈے

اس جہاں میں پیار مہکے زندگی باقی رہے
یہ دعا مانگو دلوں میں روشنی باقی رہے

آدمی پورا ہوا تو دیوتا ہو جائے گا
یہ ضروری ہے کہ اس میں کچھ کمی باقی رہے

دوستوں سے دل کا رشتہ کاش ہو کچھ اس طرح
دشمنی کے سائے میں بھی دوستی باقی رہے

دل کے آنگن میں اگے گا خواب کا سبزہ ضرور
شرط ہے آنکھوں میں اپنی کچھ نمی باقی رہے

عشق جب کریے کسی سے دل میں یہ جذبہ بھی ہو
لاکھ ہوں رسوائیاں پر عاشقی باقی رہے

دل میں میرے پل رہی ہے یہ تمنا آج بھی
اک سمندر پی چکوں اور تشنگی باقی رہے

دوسطری

چاہے سونے کے فریم میں جڑ دو
آئینہ جھوٹ بولتا ہی نہیں

بسمل سعیدی

غم نہیں نازِ حسن ہے، حسن کے ناز اٹھائے جا
اے دلِ مبتلائے غم! غم میں بھی مسکرائے جا

حسن ہے عشقِ آفریں حسن پہ دل لٹائے جا
عشق کو دردِ دل بنا، درد کو دل بنائے جا

جلوہ بہ جلوہ گر نہیں، پردہ بہ پردہ آئے جا
دل میں مرے سمائے جا، روح میں جگمگائے جا

شُورشِ کائنات میں غم کو خوشی منائے جا
ہنس مرے آنسوؤں میں تُو، آہ میں مسکرائے جا

تاروں میں جگمگائے جا، چاند میں مسکرائے جا
دور  سے  کوئی  نغمۂ روح  فزا سنائے  جا

ضبط بقدرِ ظرف ہے، ظرف بقدرِ شوق ہے
تُو ابھی سامنے نہ آ، شوق ابھی بڑھائے جا

باہمہ ترکِ رسم و راہ کچھ تو ہو التفات بھی
تو مجھے بھول جا  مگر، یاد مجھے آئے جا

حسن سے بڑھ کے بدگماں عشق ہے اپنے آپ سے
میں ابھی مطمئن نہیں، تو مجھے آزمائے جا

صرف  جبینِ  شوق  ہو اور  کسی کا آستاں
سجدے بھی درمیاں نہ ہوں سجدوں کو بھی مٹائے جا

بزمِ نشاطِ کائنات مجھ پہ ہے خندہ زن ہنوز
خلوتِ غم میں تو ابھی اور مجھے رلائے جا

اب نہ وہ بسمل اور نہ تُو اب نہ وہ دل نہ آرزو
اب تو خدا کے واسطے یاد اسے نہ آئے جا

(بسمل سعیدی)

وارث کرمانی

لاکھ ناداں ہیں مگر اتنی سزا بھی نہ ملے
چارہ سازوں کو مری شامِ بلا بھی نہ ملے

حسرت  آگیں تو  ہے  ناکامئ  منزل  لیکن
لطف تو جب ہے کہ خود اپنا پتا بھی نہ ملے

کچھ نگاہوں سے غمِ دل کی خبر ملتی ہے
ورنہ ہم وہ ہیں کہ باتوں سے ہوا بھی نہ ملے

خواہشِ داد رسی کیا ہو ستمگر سے جہاں
آنکھ  میں  شائبۂ  عذرِ  جفا  بھی  نہ ملے

اس قدر قحطِ بصیرت بھی نہیں اے واعظ
ہم بتوں کے لئے  نکلیں تو  خدا بھی نہ ملے

عشق  وہ عرصۂ  پر خار  ہے ہمدم کہ جہاں
زندگی  راس  نہ آئے  تو  قضا  بھی نہ ملے

کیا  قیامت  ہے طبیعت  کی  روانی  وارث
کوئی ڈھونڈھے تو نشانِ کفِ پا بھی نہ ملے

(وارث کرمانی)

دو سطری

آپ کو کون ‘تُم’ پکارے گا۔۔۔؟

آپ کس کو کہا کریں گے ‘آپ’ ؟

کرشن موہن

چاہتوں کا جہان ہے اردو
کرشن موہن
چاہتوں کا جہان ہے اردو
راحتوں کا نشان ہے اردو
عشق کا اعتبار اور وقار
حسن کی آن بان ہے اردو
دل فزا ضو کدہ صباحت کا
اور ملاحت کی کان ہے اردو
نثر کا ہے خرام خوش ہنگام
شاعری کی اڑان ہے اردو
زندہ ہے اپنا ذوق و شوق اس سے
آرزوؤں کی جان ہے اردو
لطف ہستی کا رنگ مستی کا
خوش نما کاروان ہے اردو
ذکر آرائش خم کاکل
کیف ہندوستان ہے اردو
دفتر اتحاد و یک جہتی
پیار کی داستان ہے اردو
ایکتا ہے انیکتا میں بھی
دوست داری کا مان ہے اردو
غالبؔ و میرؔ اس کے شیدا تھے
جن کی روح روان ہے اردو
آتشؔ و مومنؔ و نظیرؔ و جگرؔ
جن کی رنگیں زبان ہے اردو
اس کے عاشق نسیمؔ اور چکبستؔ
جن کے جذبوں کی شان شان ہے اردو
دوست اس کے سرورؔ اور سرشارؔ
اس لئے شادمان ہے اردو
درد مند اس کے پریم چندؔ رہے
جن کے باعث جوان ہے اردو
اس کے مشتاق ملاؔ اور فراقؔ
جن کے دل کا بیان ہے اردو
نعرہ زن جوشؔ کا خروش اس میں
جوش کی ترجمان ہے اردو
فیضؔ و اقبالؔ و کرشن چندر سے
وسعت بے کران ہے اردو
دھوم محرومؔ کی ہوئی اس میں
اور منورؔ کی آن ہے اردو
راشدؔ و میراجیؔ کی البیلی
شوخ ادا راز دان ہے اردو
فطنت و فن کی دولت بیدار
کرشن موہنؔ کی جان ہے اردو

اقبال عظیم

وہ یوں ملا کہ بظاہر خفا خفا سا لگا
نہ جانے کیوں وہ مجھے پھر بھی با وفا سا لگا

مزاج اس نے نہ پوچھا، مگر سلام لیا
یہ بے رخی کا سلیقہ بھی کچھ بھلا سا لگا

غبارِ وقت نے کچھ یوں بدل دئے چہرے
خود اپنا شہر بھی مجھ کو نیا نیا سا لگا

گھٹی گھٹی سی لگی رات انجمن کی فضا
چراغ جو بھی جلا، کچھ بجھا بجھا سا لگا

جو ہم پہ گزری ہے شاید سبھی پہ گزری ہو
فسانہ جو بھی سنا، کچھ سنا سنا سا لگا

مجال  عرضِ  تمنا  کرے  کوئی  کیسے
جو لفظ ہونٹوں پہ آیا ڈرا ڈرا سا لگا

میں گھر سے چل کے اکیلا یہاں تک آیا ہوں
جو ہم سفر بھی ملا، کچھ تھکا تھکا سا لگا

اسی کا نام ہے شائستگی، و پاسِ وفا
پلک تک آ کے جو آنسو تھما تھما سا لگا

کچھ اس خلوص سے اس نے مجھے کہا " اقبال "
خود اپنا نام بھی مجھ کو بڑا بڑا سا لگا

(اقبال عظیم)

جمیل الدین عالی

جمیل الدین عالی
اب تک مجھے نہ کوئی مرا رازداں ملا
جو بھی ملا اسیر زمان و مکاں ملا

کیا جانے کیا سمجھ کے ہمیشہ کیا گریز
سو بار بجلیوں کو مرا آشیاں ملا

اکتا گیا ہوں جادۂ نو کی تلاش سے
ہر راہ میں کوئی نہ کوئی کارواں ملا

مدت میں ہم نے آپ بنایا تھا اک افق
جاتے تھے اس طرف کہ ترا آستاں ملا

کن حوصلوں کے کتنے دیے بجھ کے رہ گئے
اے سوز عاشقی تو بہت ہی گراں ملا

کیا کچھ لٹا دیا ہے تری ہر ادا کے ساتھ
کیا مل گیا ہمیں جو یہ حسن بیاں ملا

تھا ایک راز دار محبت سے لطف زیست
لیکن وہ راز دار محبت کہاں ملا

اک عمر بعد اسی متلون نگاہ میں
کتنی محبتوں کا خزانہ نہاں ملا

اب جستجو کا رخ جو مڑا ہے تو مت پکار
سب تجھ کو ڈھونڈتے تھے مگر تو کہاں ملا

مظفر رزمی

شامِ غم ہے تری  یادوں کو  سجا رکھا ہے
میں نے دانستہ چراغوں کو بجھا رکھا ہے

اور کیا دوں میں گلستاں سے محبت کا ثبوت
میں نے کانٹوں کو بھی پلکوں پہ سجا رکھا ہے

جانے کیوں برق کو اس سمت توجہ ہی نہیں
میں  نے ہر  طرح نشیمن  کو سجا رکھا  ہے

زندگی سانسوں کا تپتا ہوا صحرا ہی سہی
میں  نے اس ریت  پہ اک  قصر بنا  رکھا ہے

وہ مرے  سامنے دلہن کی  طرح بیٹھے  ہیں
خواب اچھا ہے، مگر خواب میں کیا رکھا ہے

خود سناتا ہے انہیں میری محبت کے خطوط
پھر  بھی قاصد  نے  مرا نام  چھپا  رکھا ہے

کچھ نہ کچھ تلخئ حالات ہے شامل رزمی
تم نے پھولوں سے بھی دامن جو بچا رکھا ہے

(مظفر رزمی)

دوسطری

نگاہِ یار کی لذت شراب کیا جانے
ہزار جام تصدق ہزار مےخانے

جون ایلیا

کربِ تنہائی ہے وہ شے! کہ خدا
آدمی کو پکار اٹھتا ہے!

غلام بھیک نیرنگ

پھر وہی ہم ہیں، خیالِ رُخِ زیبا ہے وہی
سرِ شوریدہ وہی، عشق کا سودا ہے وہی

دانہ و دام سنبھالا مرے صیّاد نے پھر
اپنی گردن ہے وہی، عشق کا پھندا ہے وہی

پھر لگی رھنے تصوّر میں وہ مژگانِ دراز
رگِ جاں میں خلشِ خارِ تمنّا ہے وہی

پھر لگا رہنے وہی سلسلۂ راز و نیاز
جلوۂ حُسن وہی، ذوقِ تماشا ہے وہی

پھر ہوا ہم کو دل و دیں کا بچانا مشکل
نگہِ ناز کا پھر ہم سے تقاضا ہے وہی

ناز نے پھر کیا آغاز وہ اندازِ نیاز
حُسنِ جاں سوز کو پھر سوز کا دعویٰ ہے وہی

محوِ دیدِ چمنِ شوق ہے پھر دیدۂ شوق
گُلِ شاداب وہی، بلبلِ شیدا ہے وہی

پھر چمک اُٹّھی وہ کجلائی ہوئی چنگاری
رختِ ہستی ہے وہی، عشق کا شعلہ ہے وہی

آرزو جی اُٹھی پھر پیار جو اُس بُت نے کیا
پھر لبِ یار میں اعجازِ مسیحا ہے وہی

پاسِ ناموس نے پھر رخصتِ رفتن چاہی
شہرتِ حُسن وہی، الفتِ رسوا ہے وہی

پھر ہوئی لیلیٰ و مجنوں کی حکایت تازہ
اُن کا عالم وہی، نیرنگؔ کا نقشہ ہے وہی

(غلام بھیک نیرنگؔ)

خورشید رضوی

وارداتِ دل کا قصہ ہے ، غمِ دنیا نہیں
شعر تیری آرسی ہے ، میرا آئینہ نہیں

کب نکلتا ہے کوئی دل میں اُتر جانے کے بعد
اس گلی کے دوسری جانب کوئی رستا نہیں

تم سمجھتے ہو، بچھڑ جانے سے مٹ جاتا ہے عشق
تم کا اِس دریا کی گہرائی کا اندازہ نہیں

اُن سے مل کر بھی کہاں مٹتا ہے دل کا اضطراب
عشق کی دیوار کے دونوں طرف سایا نہیں

کب تری بوئے قبا سے بے وفائی دل نے کی
کب مجھے بادِ صبا نے خون رُلوایا نہیں

مت سمجھ میرے تبسم کو مسرت کی دلیل
جو مرے دل تک اترتا ہو یہ وہ زینہ نہیں

یوں تراشوں گا غزل میں تیرے پیکر کے نقوش
وہ بھی دیکھے گا تجھے جس نے تجھے دیکھا نہیں

ثبت ہیں اس بام و در پر تیری آوازوں کے نقش
میں ، خدا نا کردہ، پتھر پوجنے والا نہیں

خامشی، کاغذ کے پیراہن میں لپٹی خامشی
عرضِ غم کا اس سے بہتر کوئی پیرایہ نہیں

کب تلک پتھر کی دیواروں پہ دستک دیجئے
تیرے سینے میں تو شاید کوئی دروازہ نہیں

محسن نقوی

محسنؔ نقوی

مجھے خلا  میں بھٹکنے  کی  آرزو  ہی  سہی
کہ تُو  مِلے نہ  مِلے  تیری  جُستجو  ہی  سہی

قریب  آ  شبِ   تنہائی  تجھ  سے  پیار  کریں
تمام   دن  کی  تھکن  کا  علاج  تُو  ہی  سہی

بڑے خلوص سے  ملتا  ہے جب  بھی  ملتا  ہے
وہ  بے وفا  تو  نہیں  ہے  بہانہ  جُو  ہی  سہی

مگر   وہ   اٙبر   سٙمُندر   پہ  کیوں   برستا  ہے
زمین  بانحھ  سہی، خاک   بے  نُمُو  ہی  سہی

تم    اپنے   داغِ   سٙرِ   پیرہن   کی   بات  کرو
ہمارا   دامنِ   صد   چاک   بے   رفو  ہی  سہی

یہ ناز  کم  تو  نہیں  ہے  کہ  اُن  سے  مل  آئے
وہ  ایک   پل  کو   سرِ   راہ  گفتگو  ہی  سہی

جو اپنے آپ سے شرمائے، کس  سے  بات  کرے
میں  آئینے کی طرح اُس  کے  رُوبُرو  ہی  سہی

کِسی  طرح   تو   یہ  تنہایؑیوں  کی  شام  کٹے
وصالِ    یار    نہیں   قُربتِ   عدو    ہی   سہی

یہ   سجدہّ   سرِ  مقتل  کا   وقت   ہے  محسنؔ
خود اپنے خونِ رگِ جاں سے اب وضو ہی سہی

نا معلوم

پَت جھڑ کی برسات ہو جیسے
ایسی اُس کی باتیں تھیں
جھیل سمجھ رہے تھے جن کو
وہی تو اُس کی آنکھیں تھیں

بارش

ﺑﺎﺭﺷﻮﮞ ﮐﮯ ﻣﻮﺳﻢ ﻣﯿﮟ
ﻭﮦ ﺟﻮ ﺍﭘﻨﮯ ﮐﻤﺮﮮ ﮐﯽ
ﮐﮭﮍﮐﮭﯿﻮﮞ ﮐﻮ ﺑﻨﺪ ﮐﺮ ﮐﮯ
ﺑﺎﺩﻟﻮﮞ ﮐﮯ ﺟﺎﻧﮯ ﮐﺎ
ﺍﻧﺘﻈﺎﺭ ﮐﺮﺗﮯ ﮨﯿﮟ
ﻭﮦ ﺑﮭﯽ ﺍﮎ ﺯﻣﺎﻧﮯ ﺳﮯ
ﺑﺎﺭﺷﻮﮞ ﮐﯽ ﺑﻮﻧﺪﻭﮞ ﺳﮯ
ﮐﮭﯿﻠﺘﮯ ﺭہے ﮨﻮﮞ ﮔﮯ
ﭼﻮﺩﮬﻮﯾﮟ ﮐﯽ ﺭﺍﺗﻮﮞ ﻣﯿﮟ
ﺟﻠﺪ ﺳﻮﻧﮯ ﻭﺍﻟﻮﮞ ﮐﯽ
ﭼﺎﻧﺪﻧﯽ ﺳﮯ ﻣﺎﺿﯽ ﻣﯿﮟ
ﺩﻭﺳﺘﯽ ﺭﮨﯽ ﮨﻮ ﮔﯽ
ﺣﺴﻦ ﻭ ﻋﺸﻖ ﮐﯽ ﺑﺎﺗﯿﮟ
ﺁﺝ ﻭﺍﺳﻄﮯ ﺟﻦ ﮐﮯ
ﮐﭽﮫ ﻭﻗﻌﺖ ﻧﮩﯿﮟ ﺭﮐﮭﺘﯿﮟ
ﺑﮭﻮﻟﮯ ﺑﺴﺮﮮ ﻟﻤﺤﻮﮞ ﻣﯿﮟ
ﭨﻮﭦ ﮐﺮ ﮐﺴﯽ ﮐﻮ ﻭﮦ
ﭼﺎہتے ﺭہے ﮨﻮﮞ ﮔﮯ
ﻭﮦ ﺟﻮ ﺍﭘﻨﮯ ﮔﮭﺮ ﭘﺮ ﺑﮭﯽ
ﺁﻧﮑﮫ ﻧﻢ ﻧﮩﯿﮟ ﮐﺮﺗﮯ
ﮐﻞ ﮐﺴﯽ ﮐﯽ ﺧﺎﻃﺮ ﻭﮦ
ﺧﻮﺏ ﺭﻭ ﭼﮑﮯ ﮨﻮﮞ ﮔﮯ
ﺩﺭﺩ ﺁﺷﻨﺎ ﮨﻮ ﮐﺮ
ﺍﺷﮏ ﮐﮭﻮ ﭼﮑﮯ ﮨﻮﮞ ﮔﮯ

سیّد مظفر احمد ضیاؔ

یہ مانا کہ شہ رگ سے نزدیک ہے تُو
مَیں یہ فاصلہ بھی کہاں چاہتا ہُوں۔۔۔!

پیر نصیر الدین گولڑوی

تجھ سا نہ تھا کوئی ، نہ کوئی ہے حسیں کہیں
تُو بے مثال ہے ترا ثانی نہیں کہیں

اپنا جنوں میں مدِ مقابل نہیں کہیں
دامن کہیں ، جیب کہیں ، آستیں کہیں

زاہد کے سامنے جو ہو وہ نازنیں کہیں
دل ہو کہیں حُضور کا دُنیا و دیں کہیں

اک تیرے آستاں پہ جھکی ہے ہزار بار
ورنہ کہاں جھُکی ہے ہماری جبیں کہیں

دل کا لگاؤ ، دل کی لگی ، دل لگی نہیں
ایسا نہ ہو کہ دل ہی لُٹا دیں ہمیں کہیں

کیا کہیئے کس طرف گئے جلوے بکھیر کے
وہ سامنے تو تھے ابھی میرے یہیں کہیں

گزرے گی اب تو کوچہِ جاناں میں زندگی
رہنا پڑے گا اب ہمیں جا کر وہیں کہیں

دل سے تو ہیں قریب جو آنکھوں سے دُور ہیں
موجود آس پاس ہیں وہ بالیقیں کہیں

نظروں کی اور بات ہے دل کی ہے اور بات
باتیں جو میرے دل میں ہیں اب تک نہیں کہیں

اے تازہ واردانِ چمن ! ہوشیار باش
بجلی چمک رہی ہے چمن کے قریں کہیں

میرا ضمیر اپنی جگہ پر ہے مطمئن
اپنا سمجھ کے ان سے جو باتیں کہیں ' کہیں

دل نے بہت کہا کہ تمہیں مہرباں کہوں
اِس ڈر سے چُپ رہا کہ نہ کہہ دو نہیں ، کہیں

آتے ہی ہم تو کوچہِ جاناں میں لُٹ گئے
دل کھو گیا نصیر ہمارا یہیں کہیں

کرشن بہاری نور

زندگی سے بڑی سزا ہی نہیں
اور کیا جُرم ہے پتا ہی نہیں
سچ گھٹے یا بڑھے تو سچ نہ رہے
جھوٹ کی کوئی انتہا ہی نہیں
اتنے حصوں میں بٹ گیا ہوں میں
میرے حصے میں کچھ بچا ہی نہیں
زندگی! موت تیری منزل ہے
دُوسرا کوئی راستا ہی نہیں
جس کے کارن فساد ہوتے ہیں
اُس کا کوئی اتا پتا ہی نہیں
زندگی! اب بتا کہاں جائیں
زہر بازار میں ملا ہی نہیں
دھن کے ہاتھوں بکے ہیں سب قانون
اب کسی جرم کی سزا ہی نہیں
چاہے سونے کے فریم میں جڑ دو
آئینہ جھوٹ بولتا ہی نہیں
اپنی رچناؤں میں وہ زندہ ہے
نُورؔ! سنسار سے گیا ہی نہیں

کرشن بہاری نور

بیخود دہلوی

اُس سے حالِ تباہ کیا کہنا،
جو کہے سُن کے واہ کیا کہنا
بیخود دہلوی ؔ

بیدم وارثی

سراج الشعراء بیدم وارثی

تیغ کھینچی اس نے اور تیور بدل کر رہ گیا
آج بھی شوقِ شہادت ہاتھ مل کر رہ گیا

نزع میں بیمار کروٹ بدل کر رہ گیا
جب کہا اس نے سنبھل سنبھلا سنبھل کر رہ گیا

طفلِ اشک آنکھوں سے نکلا خون دل کے ساتھ ساتھ
ان کے دامن پر پڑا مچلا مچل کر رہ گیا

میرے آغوشِ تصور سے نکلنا ہے محال
اب خیالِ یار تو سانچے میں ڈھل کر رہ گیا

آتشِ رشک و حسد سے سنگ بھی خالی نہیں
دید موسیٰؑ کو ہوئی اور طور جل کر رہ گیا

اک ہمارا دل کہ محوِ لذتِ دیدارِ شمع
ایک پروانہ کہ دیکھا اور جل کر رہ گیا

رازِ دل کا پردہ رکھا رعبِ حسن یار نے
حرفِ مطلب منہ سے نکلا اور نکل کر رہ گیا

یادِ جاناں میں تری شعلہ مزاجی کے نثار
دل میں جو کچھ تھا سوا تیرے وہ جل کر رہ گیا

جاں نثاروں کا تھا آج اس درجہ مقتل میں ہجوم
خنجرِ قاتل بھی دو اک ہاتھ چل کر رہ گیا

سوز و سازِ عشق کا انجام بیدؔم دیکھ لو
شمع ٹھنڈی ہو گئی پروانہ جل کر رہ گیا

عدیم ہاشمی

سرخئ وصل پسِ دیدہ تر پانی میں
کہاں دیکھے تھے عدیم اتنے شرر پانی میں
ڈوبتے یوں ہی نہیں دیدۂ تر پانی میں
یہی آنسو ہیں جو بنتے ہیں گہر پانی میں
پوچھ آہوں سے، ہواؤں میں تپش کیسی ہے
آنسوؤں نے تو کیا سارا سفر پانی میں
کیا خبر تھی تری آنکھوں میں بھی دل ڈوبے گا
میں تو سمجھا تھا کہ پڑتے ہیں بھنور پانی میں
کشتئ دل نے کیا رقص بڑی دیر کے بعد
دیر کے بعد ہی ناچے ہیں بھنور پانی میں
اشک پلکوں پہ جو ٹھہرے ہیں تو حیرت کیسی؟
ساحلی لوگ بنا لیتے ہیں گھر پانی میں
آب دیدہ سی ملاقات ہوئی ہے تجھ سے
عکس آیا ہے ترا مجھ کو نظر پانی میں
لمس تالاب میں ہاتھوں کا قیامت نکلا
آگ سے بڑھ کے ہوا اس کا اثر پانی میں
دل کے دریا میں لگایا تھا تمنا کا شجر
گر کے بہتا ہی رہا سارا ثمر پانی میں
فرق اتنا سا ہے اس شخص میں اور مجھ میں عدیمؔ
وہ کنارے پہ اُدھر، میں ہوں اِدھر پانی میں

ہادی مچھلی شہری

ہادیؔ مچھلی شہری

اٹھنے کو  تو اٹھا ہوں محفل سے  تری  لیکن
اب  دل کو یہ دھڑکا ہے جاؤں تو کدھر جاؤں

مرنا مری  قسمت  ہے  مرنے  سے  نہیں  ڈرتا
پیمانۂ   ہستی    کو    لبریز   تو    کر   جاؤں

تو اور مری ہستی میں اس طرح  سما  جائے
میں اور تری نظروں سے اس طرح اتر  جاؤں

دنیائے   محبت   میں   دشوار  جو  جینا  ہے
مر کر ہی سہی آخر کچھ  کام  تو  کر  جاؤں

جلال لکھنوی

وہ دل نصیب ہوا جس کو داغ بھی نہ ملا
ملا وہ غم کدہ جس میں چراغ بھی نہ ملا

گئی تھی کہہ کے میں لاتی ہوں زلفِ یار کی بو
پھری تو بادِ صبا کا دماغ بھی نہ ملا

چراغ لے کے ارادہ تھا یار کو ڈھونڈیں
شبِ فراق تھی کوئی چراغ بھی نہ ملا

خبر کو یار کی بھیجا تھا گم ہوئے ایسے
حواسِ رفتہ کا اب تک سراغ بھی نہ ملا

جلالؔ باغِ جہاں میں وہ عندلیب ہیں ہم
چمن کو پھول ملے ہم کو داغ بھی نہ ملا

جلالؔ لکھنوی

اسرار الحق مجاز

تسکین دل محزوں نہ ہوئی وہ سعئ کرم فرما بھی گئے
اس سعئ کرم کو کیا کہیے بہلا بھی گئے تڑپا بھی گئے

ہم عرض وفا بھی کر نہ سکے کچھ کہہ نہ سکے کچھ سن نہ سکے
یاں ہم نے زباں ہی کھولی تھی واں آنکھ جھکی شرما بھی گئے

آشفتگیٔ وحشت کی قسم حیرت کی قسم حسرت کی قسم
اب آپ کہیں کچھ یا نہ کہیں ہم راز تبسم پا بھی گئے

روداد غم الفت ان سے ہم کیا کہتے کیوں کر کہتے
اک حرف نہ نکلا ہونٹوں سے اور آنکھ میں آنسو آ بھی گئے

ارباب جنوں پر فرقت میں اب کیا کہئے کیا کیا گزری
آئے تھے سواد الفت میں کچھ کھو بھی گئے کچھ پا بھی گئے

یہ رنگ بہار عالم ہے کیوں فکر ہے تجھ کو اے ساقی
محفل تو تری سونی نہ ہوئی کچھ اٹھ بھی گئے کچھ آ بھی گئے

اس محفل کیف و مستی میں اس انجمن عرفانی میں
سب جام بکف بیٹھے ہی رہے ہم پی بھی گئے چھلکا بھی گئے

اسرار الحق مجاز

خود دل میں رہ کے آنکھ سے پردا کرے کوئی
اسرار الحق مجاز
خود دل میں رہ کے آنکھ سے پردا کرے کوئی
ہاں لطف جب ہے پا کے بھی ڈھونڈا کرے کوئی

تم نے تو حکم ترک تمنا سنا دیا
کس دل سے آہ ترک تمنا کرے کوئی

دنیا لرز گئی دل حرماں نصیب کی
اس طرح ساز عیش نہ چھیڑا کرے کوئی

مجھ کو یہ آرزو وہ اٹھائیں نقاب خود
ان کو یہ انتظار تقاضا کرے کوئی

رنگینی نقاب میں گم ہو گئی نظر
کیا بے حجابیوں کا تقاضا کرے کوئی

یا تو کسی کو جرأت دیدار ہی نہ ہو
یا پھر مری نگاہ سے دیکھا کرے کوئی

ہوتی ہے اس میں حسن کی توہین اے مجازؔ
اتنا نہ اہل عشق کو رسوا کرے کوئی

حافظ شیرازی

گفتی کہ بہ مہ نَظَر کُن و انگار مَنَم
روئے تو ام آرزوست مہ را چہ کُنَم
مہ چُوں تو کُجا بُود کہ اندر ماھے
یک شب چو رُخَت باشد و باقی چو تَنَم

(حافظ شیرازی)

تو نے کہا کہ چاند کو دیکھ لوں اور سمجھ لے کہ میں ہوں۔ (لیکن) مجھے تو تمھارے چہرے کی آرزو ہے میں چاند کو کیا کروں۔ چاند تجھ جیسا کہاں ہو سکتا ہے کہ وہ تو ایک مہینے میں، (صرف) ایک رات (چودھویں کی) تمھارے چہرے کی طرح ہوتا ہے اور باقی راتوں میرے جسم کی طرح (نحیف و نزار و لاغر)۔

خمار بارہ بنکوی

وہ کون ہیں جو غم کا مزہ جانتے نہیں
بس دُوسروں کے درد کو پہچانتے نہیں

اِس جبرِ مصلحت سے تو رُسوائیاں بھلی
جیسے کہ ہم اُنھیں وہ ہمیں جانتے نہیں

کمبخت آنکھ اُٹھی نہ کبھی اُن کے رُوبرُو
ہم اُن کو جانتے تو ہیں، پہچانتے نہیں

واعظ خُلوص ہے تِرے اندازِ فکر میں
ہم تیری گفتگو کا بُرا مانتے نہیں

حد سے بڑھے توعلم بھی ہے جہل دوستو
سب کچھ جو جانتے ہیں، وہ کچھ جانتے نہیں

رہتے ہیں عافیّت سے وہی لوگ اے خمار
جو زندگی میں دل کا کہا مانتے نہیں

سید ہمایوں مرزا حقیر

چشمِ مخمور سے بیخود جو نہ ہو جاتے ہم
دل کو آتشکدہ اور چشم کو دریا کرتے

کر کے بسمل جو ہمیں چھوڑ دیا قاتل نے
ہم تڑپتے کہ اسے دیکھتے کیا کیا کرتے

سید ہمایوں میرزا حقیر

علی زریون

حالت جو ہماری ہے تمہاری تو نہیں ہے
ایسا ہے تو پھر یہ کوئی یاری تو نہیں ہے
جتنی بھی بنا لی ہو، کما لی ہو یہ دنیا
دنیا ہے تو پھر دوست ! تمہاری تو نہیں ہے
تحقیر نہ کر ! یہ مِری اُدھڑی ہُوئی گدڑی
جیسی بھی ھے اپنی ہے ادھاری تو نہیں ہے
یہ تُو جو محبت میں صلہ مانگ رہا ہے
اے شخص تو اندر سے بھکاری تو نہیں ہے ؟
میں " ذات" نہیں، بات کے نشّے میں ہوں پیارے
اس وقت مجھے تیری خماری تو نہیں ہے
تنہا ہی سہی ، لڑ تو رہی ہے وہ اکیلی
بس تھک کے گری ہے ابھی ہاری تو نہیں ہے
مجمع سے اُسے یوں بھی بہت چڑ ہے کہ زریون
عاشق ہے مری جان ! مداری تو نہیں ہے
علی زریون

شاکر شجاع آبادی

اساں شاکر __ لوگ آوارہ جئے
ساکوں پیار نہ کر برباد ہو سی

پیر نصیر الدین نصیر گولڑوی

بے خودی میں نہ رہی ہم کو نصیر اپنی خبر
ہوش آیا تو ہمیں جلوہءِ جاناں نکلے

سعود عثمانی

جانا انجانا

یہ جان رکھنا کہ زندگی کی ہر ایک ساعت رواں دواں ہے
یہ دھیان رکھنا
کہ چند لمحوں کی یہ رفاقت بس ایک چھوٹی سی داستاں ہے
یہ ختم ہوگی تو یوں لگے گا کہ جیسے دھندلا سا خواب کوئی
نظر کی حد پر سراب کوئی
ذرا یہ سوچو کہ حافظے کا کھلا سمندر
نہ جانے کتنے رفیق و ہمدم سمو چکا ہے
رفیق چہرے جو نام تک اپنے کھو چکے ہیں
وہ سارے ساتھی جو اب فراموش ہوچکے ہیں

بھلا ہی دینا اگر یونہی وقت کا عمل ہے
تو یہ اٹل ہے
کہ مدتوں بعد یوں بھی ہوگا
اگر سرِ راہ اتفاقاً کبھی جو ہم تم کہیں ملیں گے
تو اپنے دل میں یہی کہیں گے
کہ اِس کا چہرہ تو آشنا تھا
خبر نہیں اس کا نام کیا تھا
یہ شخص جانے کہاں ملا تھا

(سعود عثمانی )

علی زریون

یہ دنیا بھی عجب قصہ ہے صاحب
نہیں لگتا، مگر دھوکا ہے صاحب
یہ چرچا جو ہمارے نام کا ہے
تمھارے عشق کا صدقہ ہے صاحب
ابھی پرہیز رکھئے گفتگو سے
زوالِ عصر کا لمحہ ہے صاحب
طبیعت میں ذرا گرمی ہے اس کی
مگر وہ آدمی ہیرا ہے صاحب
تمھارے ہاں نہیں ہوتا ہے جو کچھ
ہمارے ہاں وہی ہوتا ہے صاحب
بچشمِ خشک مت پڑھنا اسے تم
کہ یہ مصرع نہیں شعلہ ہے صاحب
بجا فرما رہے ہیں آپ یعنی
ہمیں کچھ اور ہی سودا ہے صاحب
اسے دیوارِ گریہ ہی سمجھئیے
جنابِ میر کا حجرہ ہے صاحب
خدا کی شان ہے، جو تیرے آگے
اگر یہ آینہ زندہ ہے صاحب
اب ایسے بھی تو لا وارث نہیں ہم
ہمارا بھی کوئی اپنا ہے صاحب
اسے خط میں فقط اتنا لکھا ہے
ترے بن جی نہیں لگتا ہے صاحب
تو یہ بھی کوئی چالاکی ہے اس کی؟
اگر وہ ان دنوں تنہا ہے صاحب؟
چلو جھوٹا سہی لیکن یہ جھوٹا
ترے ’’سچوں‘‘ سے تو اچھا ہے صاحب
تو ظاہر ہے کہ پھر تیکھا تو ہو گا
علی زریون کا لہجہ ہے صاحب