عمیر نجمی

تم کو وحشت تو سکھا دی ہے، گزارے لائق
اور کوئی حکم؟  کوئی کام، ہمارے لائق؟

معذرت! میں تو کسی اور کے مصرف میں ہوں
ڈھونڈ دیتا ہوں مگر کوئی تمہارے لائق

ایک دو زخموں کی گہرائی اور آنکھوں کے کھنڈر
اور کچھ خاص نہیں مجھ میں نظارے لائق

گھونسلہ، چھاؤں، ہرا رنگ، ثمر، کچھ بھی نہیں
دیکھ! مجھ جیسے شجر ہوتے ہیں آرے لائق

دو وجوہات پہ اس دل کی اسامی نہ ملی
ایک) درخواست گزار اتنے؛ دو) سارے لائق

اس علاقے میں اجالوں کی جگہ کوئی نہیں
صرف پرچم ہے یہاں چاند ستارے لائق

مجھ نکمے کو چنا اس نے ترس کھا کے عمیر!
دیکھتے رہ گئے حسرت سے بچارے لائق

عمیر نجمی

احمد فراز

اسی خیال سے تاروں کو رات بھر دیکھوں
کہ تجھ کو صبحِ قیامت سے پیشتر دیکھوں

اس اک چراغ کی لو چبھ رہی ہے آنکھوں میں
تمام شہر ہو روشن تو اپنا گھر دیکھوں

مجھے خود اپنی طبیعت پہ اعتبار نہیں
خدا کرے کہ تجھے اب نہ عمر بھر دیکھوں

جدا سہی میری منزل بچھڑ نہیں سکتا
میں کس طرح تجھے اوروں کا ہمسفر دیکھوں

صداۓ غولِ بیاباں نہ ہو یہ آوازہ
میرا وجود ہے پتھر جو لوٹ کر دیکھوں

وہ لب فراز اگر کر سکیں مسیحائی
بقولِ درد میں سو سو طرح سے مر دیکھوں

دسمبر

ﺁﺧﺮﯼ ﭼﻨﺪ ﺩﻥ ﺩﺳﻤﺒﺮ ﮐﮯ
ﮨﺮ ﺑﺮﺱ ﮨﯽ ﮔﺮﺍﮞ ﮔﺰﺭﺗﮯ ﮨﯿﮟ
ﺧﻮﺍﮨﺸﻮﮞ ﮐﮯ ﻧﮕﺎﺭ ﺧﺎﻧﮯ ﻣﯿﮟ
ﮐﯿﺴﮯ ﮐﯿﺴﮯ ﮔﻤﺎﮞ ﮔﺰﺭﺗﮯ ﮨﯿﮟ
ﺭﻓﺘﮕﺎﮞ ﮐﮯﺑﮑﮭﺮﺗﮯ ﺳﺎﻟﻮﮞ ﮐﯽ
ﺍﯾﮏ ﻣﺤﻔﻞ ﺳﯽ ﺩﻝ ﻣﯿﮟ ﺳﺠﺘﯽ ﮨﮯ
ﻓﻮﻥ ﮐﯽ ﮈﺍﺋﺮﯼ ﮐﮯ ﺻﻔﺤﻮﮞ ﺳﮯ
ﮐﺘﻨﮯ ﻧﻤﺒﺮ ﭘﮑﺎﺭﺗﮯ ﮨﯿﮟ ﻣﺠﮭﮯ
ﺟﻦ ﺳﮯ ﻣﺮﺑﻮﻁ ﺑﮯ ﻧﻮﺍ ﮔﮭﻨﭩﯽ
ﺍﺏ ﻓﻘﻂ ﻣﯿﺮﮮ ﺩﻝ ﻣﯿﮟ ﺑﺠﺘﯽ ﮨﮯ
ﮐﺲ ﻗﺪﺭ ﭘﯿﺎﺭﮮ ﭘﯿﺎﺭﮮ ﻧﺎﻣﻮﮞ ﭘﺮ
ﺭﯾﻨﮕﺘﯽ ﺑﺪﻧﻤﺎ ﻟﮑﯿﺮﯾﮟ ﺳﯽ
ﻣﯿﺮﯼ ﺁﻧﮑﮭﻮﮞ ﻣﯿﮟ ﭘﮭﯿﻞ ﺟﺎﺗﯽ ﮨﯿﮟ
ﺩﻭﺭﯾﺎﮞ ﺩﺍﺋﺮﮮ ﺑﻨﺎﺗﯽ ﮨﯿﮟ
ﺩﮬﯿﺎﻥ ﮐﯽ ﺳﯿﮍﮬﯿﻮﮞ ﻣﯿﮟ ﮐﯿﺎ ﮐﯿﺎ ﻋﮑﺲ
ﻣﺸﻌﻠﯿﮟ ﺩﺭﺩ ﮐﯽ ﺟﻼﺗﮯ ﮨﯿﮟ
ﺍﯾﺴﮯ ﮐﺎﻏﺬ ﭘﮧ ﭘﮭﯿﻞ ﺟﺎﺗﮯ ﮨﯿﮟ
ﺣﺎﺩﺛﮯ ﮐﮯ ﻣﻘﺎﻡ ﭘﺮ ﺟﯿﺴﮯ
ﺧﻮﻥ ﮐﮯ ﺳﻮﮐﮭﮯ ﻧﺸﺎﻧﻮﮞ ﭘﺮ
ﭼﺎﮎ ﮐﯽ ﻻﺋﻨﯿﮟ ﻟﮕﺎﺗﮯ ﮨﯿﮟ
ﮨﺮ ﺩﺳﻤﺒﺮ ﮐﮯ ﺁﺧﺮﯼ ﺩﻥ ﻣﯿﮟ
ﮨﺮ ﺑﺮﺱ ﮐﯽ ﻃﺮﺡ ﺍﺏ ﺑﮭﯽ
ﮈﺍﺋﺮﯼ ﺍﯾﮏ ﺳﻮﺍﻝ ﮐﺮﺗﯽ ﮨﮯ
ﮐﯿﺎ ﺧﺒﺮ ﺍﺱ ﺑﺮﺱ ﮐﮯ ﺁﺧﺮ ﺗﮏ
ﻣﯿﺮﮮ ﺍﻥ ﺑﮯ ﭼﺮﺍﻍ ﺻﻔﺤﻮﮞ ﺳﮯ
ﮐﺘﻨﮯ ﮨﯽ ﻧﺎﻡ ﮐﭧ ﮔﺌﮯ ﮨﻮﻧﮕﮯ
ﮐﺘﻨﮯ ﻧﻤﺒﺮ ﺑﮑﮭﺮ ﮐﮯ ﺭﺳﺘﻮﮞ ﻣﯿﮟ
ﮔﺮﺩ ﻣﺎﺿﯽ ﺳﮯ ﺍﭦ ﮔﺌﮯ ﮨﻮﻧﮕﮯ
ﺧﺎﮎ ﮐﯽ ﮈﮬﯿﺮﯾﻮﮞ ﮐﮯ ﺩﺍﻣﻦ ﻣﯿﮟ
ﮐﺘﻨﮯ ﻃﻮﻓﺎﻥ ﺳﻤﭧ ﮔﺌﮯ ﮨﻮﻧﮕﮯ
ﮨﺮﺩﺳﻤﺒﺮ ﻣﯿﮟ ﺳﻮﭼﺘﺎ ﮨﻮﮞ ﻣﯿﮟ
ﺍﯾﮏ ﺩﻥ ﺍﺱ ﻃﺮﺡ ﺑﮭﯽ ﮨﻮﻧﺎ ﮨﮯ
ﺭﻧﮓ ﮐﻮ ﺭﻭﺷﻨﯽ ﻣﯿﮟ ﮐﮭﻮﻧﺎ ﮨﮯ
ﺍﭘﻨﮯ ﺍﭘﻨﮯ ﮔﮭﺮﻭﮞ ﻣﯿﮟ ﺭﮐﮭﯽ ﮨﻮﺋﯽ
ﮈﺍﺋﺮﯼ ،ﺩﻭﺳﺖ ﺩﯾﮑﮭﺘﮯ ﮨﻮﻧﮕﮯ
ﺍﻥ ﮐﯽ ﺁﻧﮑﮭﻮﮞ ﮐﮯ ﺧﺎﮐﺪﺍﻧﻮﮞ ﻣﯿﮟ
ﺍﯾﮏ ﺻﺤﺮﺍ ﺳﺎ ﭘﮭﯿﻠﺘﺎ ﮨﻮﮔﺎ
ﺍﻭﺭ ﮐﭽﮫ ﺑﮯ ﻧﺸﺎﮞ ﺻﻔﺤﻮﮞ ﺳﮯ
ﻧﺎﻡ ﻣﯿﺮﺍ ﺑﮭﯽ
ﮐﭧ ﮔﯿﺎ ﮨﻮﮔﺎ !

جمیل الدین عالی

ایک  عجیب  راگ  ہے،  ایک  عجیب  گفتگو
سات سروں کی آگ ہے، آٹھویں سر کی جستجو

بجھتے ہوئے مرے خیال، جن میں ہزارہا سوال
پھر سے بھڑک کے روح میں،پھیل گئے ہیں چار سو

تیرہ شبی پہ صبر تھا، سو وہ کسی کو بھا گیا
آپ  ہی آپ  چھا  گیا، ایک  سحابِ رنگ و بو

ہنستی ہوئی گئی ہے صبح، پیار سے آ رہی ہے شام
تیری  شبیہ  بن  گئی، وقت  کی  گرد  ہو بہو

پھر یہ تمام سلسلہ، کیا ہے، کدھر کو جائے گا؟
میری  تلاش  در بہ  در، تیرا  گریز  کو بہ کو

خون- جنوں تو جل گیا، شوق کدھر نکل گیا؟
سست ہیں دل کی دھڑکنیں، تیز ہیں نبضِ آرزو

تیرا  مرا  قصور  کیا،  یہ  تو  ہے  جبرِ ارتقا
بس وہ جو  ربط ہو گیا،  آپ ہی  پا گئی نمو

میں جو رہا ہوں بے سخن، یہ بھی ہے احترامِ فن
یعنی  مجھے  عزیز  تھی،  اپنی  غزل کی آبرو

جمیل الدین عالی

‏ﺩﺍﻍؔ ﺩﮨﻠﻮﯼ

ﺭﺍﮦ ﭘﺮ ﺍُﻥ ﮐﻮ ﻟﮕﺎ ﻻﺋﮯ ﺗﻮ ﮨﯿﮟ ﺑﺎﺗﻮﮞ ﻣﯿﮟ
ﺍﻭﺭ ﮐﮭُﻞ ﺟﺎﺋﯿﮟ ﮔﮯ ﺩﻭ ﭼﺎﺭ ﻣﻼﻗﺎﺗﻮﮞ ﻣﯿﮟ

ﯾﮧ ﺑﮭﯽ ﺗﻢ ﺟﺎﻧﺘﮯ ﮨﻮ ﭼﻨﺪ ﻣﻼﻗﺎﺗﻮﮞ ﻣﯿﮟ
ﺁﺯﻣﺎﯾﺎ ﮨﮯ ﺗﻤﮩﯿﮟ ﮨﻢ ﻧﮯ ﮐﺌﯽ ﺑﺎﺗﻮﮞ ﻣﯿﮟ

ﻏﯿﺮ ﮐﮯ ﺳﺮ ﮐﯽ ﺑﻼﺋﯿﮟ ﺟﻮ ﻧﮩﯿﮟ ﻟﯿﮟ ﻇﺎﻟﻢ
ﮐﯿﺎ ﻣﺮﮮ ﻗﺘﻞ ﮐﻮ ﺑﮭﯽ ﺟﺎﻥ ﻧﮩﯿﮟ ﮨﺎﺗﮭﻮﮞ ﻣﯿﮟ

ﺍﺑﺮِ ﺭﺣﻤﺖ ﮨﯽ ﺑﺮﺳﺘﺎ ﻧﻈﺮ ﺁﯾﺎ ﺯﺍﮨﺪ
ﺧﺎﮎ ﺍﮌﺗﯽ ﮐﺒﮭﯽ ﺩﯾﮑﮭﯽ ﻧﮧ ﺧﺮﺍﺑﺎﺗﻮﮞ ﻣﯿﮟ

ﯾﺎﺭﺏ ! ﺍﺱ ﭼﺎﻧﺪ ﮐﮯ ﭨﮑﮍﮮ ﮐﻮ ﮐﮩﺎﮞ ﺳﮯ ﻻﺅﮞ
ﺭﻭﺷﻨﯽ ﺟﺲ ﮐﯽ ﮨﻮ ﺍﻥ ﺗﺎﺭﻭﮞ ﺑﮭﺮﯼ ﺭﺍﺗﻮﮞ ﻣﯿﮟ

ﺗﻤﮩﯿﮟ ﺍﻧﺼﺎﻑ ﺳﮯ ﺍﮮ ﺣﻀﺮﺕِ ﻧﺎﺻﺢ ﮐﮩﮧ ﺩﻭ
ﻟﻄﻒ ﺍُﻥ ﺑﺎﺗﻮﮞ ﻣﯿﮟ ﺁﺗﺎ ﮨﮯ ﮐﮧ ﺍِﻥ ﺑﺎﺗﻮﮞ ﻣﯿﮟ

ﺩﻭﮌ ﮐﺮ ﺩﺳﺖِ ﺩﻋﺎ ﺳﺎﺗﮫ ﺩﻋﺎ ﮐﮯ ﺟﺎﺗﮯ
ﮨﺎﺋﮯ ﭘﯿﺪﺍ ﻧﮧ ﮨﻮﺋﮯ ﭘﺎﺅﮞ ﻣﯿﺮﮮ ﮨﺎﺗﮭﻮﮞ ﻣﯿﮟ

ﺟﻠﻮﮦٔ ﯾﺎﺭ ﺳﮯ ﺟﺐ ﺑﺰﻡ ﻣﯿﮟ ﻏﺶ ﺁﯾﺎ ﮨﮯ
ﺗﻮ ﺭﻗﯿﺒﻮﮞ ﻧﮯ ﺳﻨﺒﮭﺎﻻ ﮨﮯ ﻣﺠﮭﮯ ﮨﺎﺗﮭﻮﮞ ﻣﯿﮟ

ﺍﯾﺴﯽ ﺗﻘﺮﯾﺮ ﺳﻨﯽ ﺗﮭﯽ ﻧﮧ ﮐﺒﮭﯽ ﺷﻮﺥ ﻭ ﺷﺮﯾﺮ
ﺗﯿﺮﯼ ﺁﻧﮑﮭﻮﮞ ﮐﮯ ﺑﮭﯽ ﻓﺘﻨﮯ ﮨﯿﮟ ﺗﺮﯼ ﺑﺎﺗﻮﮞ ﻣﯿﮟ

ﮨﻢ ﺳﮯ ﺍﻧﮑﺎﺭ ﮨﻮﺍ، ﻏﯿﺮ ﺳﮯ ﺍﻗﺮﺍﺭ ﮨﻮﺍ
ﻓﯿﺼﻠﮧ ﺧﻮﺏ ﮐﯿﺎ ﺁﭖ ﻧﮯ ﺩﻭ ﺑﺎﺗﻮﮞ ﻣﯿﮟ

ﮨﻔﺖ ﺍﻓﻼﮎ ﮨﯿﮟ ﻟﯿﮑﻦ ﻧﮩﯿﮟ ﮐﮭُﻠﺘﺎ ﯾﮧ ﺣﺠﺎﺏ
ﮐﻮﻧﺴﺎ ﺩﺷﻤﻦِ ﻋﺸّﺎﻕ ﮨﯿﮟ ﺍﻥ ﺳﺎﺗﻮﮞ ﻣﯿﮟ

ﺍﻭﺭ ﺳﻨﺘﮯ ﺍﺑﮭﯽ ﺭﻧﺪﻭﮞ ﺳﮯ ﺟﻨﺎﺏِ ﻭﺍﻋﻆ
ﭼﻞ ﺩﺋﯿﮯ ﺁﭖ ﺗﻮ ﺩﻭ ﭼﺎﺭ ﺻﻠٰﻮﺍﺗﻮﮞ ﻣﯿﮟ

ﮨﻢ ﻧﮯ ﺩﯾﮑﮭﺎ ﺍﻧﮩﯿﮟ ﻟﻮﮔﻮﮞ ﮐﻮ ﺗﺮﺍ ﺩﻡ ﺑﮭﺮﺗﮯ
ﺟﻦ ﮐﯽ ﺷﮩﺮﺕ ﺗﮭﯽ ﯾﮧ ﮨﺮﮔﺰ ﻧﮩﯿﮟ ﺍﻥ ﺑﺎﺗﻮﮞ ﻣﯿﮟ

ﺑﮭﯿﺠﮯ ﺩﯾﺘﺎ ﮨﮯ ﺍﻧﮩﯿﮟ ﻋﺸﻖ ﻣﺘﺎﻉِ ﺩﻝ ﻭ ﺟﺎﮞ
ﺍﯾﮏ ﺳﺮﮐﺎﺭ ﻟُﭩﯽ ﺟﺎﺗﯽ ﮨﮯ ﺳﻮﻏﺎﺗﻮﮞ ﻣﯿﮟ

ﺩﻝ ﮐﭽﮫ ﺁﮔﺎﮦ ﺗﻮ ﮨﻮ ﺷﯿﻮﮦٔ ﻋﯿﺎﺭﯼ ﺳﮯ
ﺍﺱ ﻟﺌﮯ ﺁﭖ ﮨﻢ ﺁﺗﮯ ﮨﯿﮟ ﺗﺮﯼ ﮔﮭﺎﺗﻮﮞ ﻣﯿﮟ

ﻭﺻﻞ ﮐﯿﺴﺎ ﻭﮦ ﮐﺴﯽ ﻃﺮﺡ ﺑﮩﻠﺘﮯ ﮨﯽ ﻧﮧ ﺗﮭﮯ
ﺷﺎﻡ ﺳﮯ ﺻﺒﺢ ﮨﻮﺋﯽ ﺍُﻥ ﮐﯽ ﻣﺪﺍﺭﺍﺗﻮﮞ ﻣﯿﮟ

ﻭﮦ ﮔﺌﮯ ﺩﻥ ﺟﻮ ﺭﮨﮯ ﯾﺎﺩ ﺑﺘﻮﮞ ﮐﯽ ﺍﮮ ﺩﺍﻍؔ
ﺭﺍﺕ ﺑﮭﺮ ﺍﺏ ﺗﻮ ﮔﺰﺭﺗﯽ ﮨﮯ ﻣﻨﺎﺟﺎﺗﻮﮞ ﻣﯿﮟ

‏ﺩﺍﻍؔ ﺩﮨﻠﻮﯼ 

پنڈت ہری چند اختر

سیرِ دنیا سے غرض تھی محوِ دنیا کر دیا
میں نے کیا چاہا مرے اللہ نے کیا کر دیا

روکنے والا نہ تھا کوئی خدا کو اس لیے
جو کچھ آیا اس کے جی میں بے محابا کر دیا

ہاں اسی کم بخت دل نے کر دیا افشائے راز
ہاں اسی کم بخت دل نے مجھ کو رسوا کر دیا

عشق جا ان تیری باتوں میں نہیں آنے کے ہم
اچھے اچھوں کو جہاں میں تو نے رسوا کر دیا

زندگی بیٹھی تھی اپنے حسن پر بھولی ہوئی
موت نے آتے ہی سارا رنگ پھیکا کر دیا

حسن نے پہلے تو سب مجھ پر حقیقت کھول دی
اور پھر خاموش رہنے کا اشارا کر دیا

حسن کو پہنا چکے جب خود نمائی کا لباس
عشق نے سر پیٹ کر پوچھا کہ یہ کیا کر دیا

پنڈت ہری چند اخترؔ

پطرس بخاری

"دو راہہ"

یہ مَیں نے کہہ تو دیا تُجھ سے عِشق ہے مُجھ کو
تِرا ہی در میری آوارگی کا محور ہے

تُجھی سے رات کی مستی تُجھی سے دِن کا خُمار
تُجھی سے میری رگ و پے میں زہرِ احمر ہے

تُجھی کو مَیں نے دیا اِختِیار گریے پر
یہ چشم خُشک اگر ہے یہ چشم اگر تر ہے

تِرا ہی جِسم چمن ہے ترا ہی جسم بہار
تِری ہی زُلف سے ہر آرزُو مُعطّر ہے

تِرا ہی حُسن ہے فِطرت کا آخری شاہکار
کہ جو ادا ہے وہ تیری ادا سے کمتر ہے

یہ مَیں نے کہہ تو دیا تُجھ سے عِشق ہے لیکن
مِرے بیان میں اِک لرزشِ خفی بھی ہے

تُو میرے دعوئے اُلفت کی آن پر مت جا
کہ اِس میں ایک ندامت دبی دبی بھی ہے

وفا کی طلب ہے تِرا عِشق اور مِرے دِل میں
تِری لگن کے سِوا اور بے کلی بھی ہے

تُجھی سے دِل کا تلاطُم ہے اور نِگہ کا قرار
اِسی قرار و تلاطُم سے زِندگی بھی ہے

مگر ہیں اور بھی طُوفان اِس زمانے میں
کہ جن میں عِشق کی ناؤ شکستنی بھی ہے

مِری نِگاہ کے ایسے بھی ہوں گے چند انداز
کہ تُو کہے کہ یہ محرم ہے اجنبی بھی ہے

شبِ وِصال کی اِس مخملیں اندھیرے میں
مِری تلاش میں فردا کی روشنی بھی ہے

مُجھے تُو  آ کے مِلی وقت کے دو راہے پر
کہ صُبحِ زیست بھی ہے موت کی گھڑی بھی ہے

(کاروان)

پطرسؔ بخاری

صابر ظفر

ﺩﻥ ﮐﻮ ﻣﺴﻤﺎﺭ ﮨﻮﺋﮯ ﺭﺍﺕ ﮐﻮ ﺗﻌﻤﯿﺮ ﮨﻮﺋﮯ
ﺧﻮﺍﺏ ﮨﯽ ﺧﻮﺍﺏ ﻓﻘﻂ ﺭﻭﺡ ﮐﯽ ﺟﺎﮔﯿﺮ ﮨﻮﺋﮯ

ﻋﻤﺮ ﺑﮭﺮ ﻟﮑﮭﺘﮯ ﺭﮨﮯ ﭘﮭﺮ ﺑﮭﯽ ﻭﺭﻕ ﺳﺎﺩﮦ ﺭﮨﺎ
ﺟﺎﻧﮯ ﮐﯿﺎ ﻟﻔﻆ ﺗﮭﮯ ﺟﻮ ﮨﻢ ﺳﮯ ﻧﮧ ﺗﺤﺮﯾﺮ ﮨﻮﺋﮯ

ﯾﮧ ﺍﻟﮓ ﺩﮐﮫ ﮨﮯ ﮐﮧ ﮨﯿﮟ ﺗﯿﺮﮮ ﺩﮐﮭﻮﮞ ﺳﮯ ﺁﺯﺍﺩ
ﯾﮧ ﺍﻟﮓ ﻗﯿﺪ ﮨﮯ ﮨﻢ ﮐﯿﻮﮞ ﻧﮩﯿﮟ ﺯﻧﺠﯿﺮ ﮨﻮﺋﮯ

ﺩﯾﺪﮦ ﻭ ﺩﻝ ﻣﯿﮟ ﺗﺮﮮ ﻋﮑﺲ ﮐﯽ ﺗﺸﮑﯿﻞ ﺳﮯ ﮨﻢ
ﺩﮬﻮﻝ ﺳﮯ ﭘﮭﻮﻝ ﮨﻮﺋﮯ ﺭﻧﮓ ﺳﮯ ﺗﺼﻮﯾﺮ ﮨﻮﺋﮯ

ﮐﭽﮫ ﻧﮩﯿﮟ ﯾﺎﺩ ﮐﮧ ﺷﺐ ﺭﻗﺺ ﮐﯽ ﻣﺤﻔﻞ ﻣﯿﮟ ﻇﻔﺮؔ
ﮨﻢ ﺟﺪﺍ ﮐﺲ ﺳﮯ ﮨﻮﺋﮯ ﮐﺲ ﺳﮯ ﺑﻐﻞ ﮔﯿﺮ ﮨﻮﺋﮯ

صابر ظفرؔ

اقبال عظیم

منصب تو ہمیں بھی مل سکتے تھے لیکن شرط حضوری تھی
یہ شرط ہمیں منظور نہ تھی، بس اتنی سی مجبوری تھی

کہتے ہیں کہیں اک نگری تھی، سلطان جہاں کا جابر تھا
اور جبر کا اذنِ عام بھی تھا، یہ رسم وہاں جمہوری تھی

ہم ٹھوکر کھا کر جب بھی گرے،   رہ گیروں کو آواز نہ دی
وہ آنکھوں کی معذوری تھی، یہ غیرت کی مجبوری تھی

لہجے میں انا، ماتھے پہ شکن، اس وقت کا عین تقاضا ہے
اب  ہر وہ بات  ضروری ہے  جو پہلے  غیر ضروری تھی

ہم  اہلِ سخن  کی  قیمت  ہے  اقبال  زبانی  داد و  دہش
کل محفل میں جو ہم کو ملی وہ داد نہ تھی،مزدوری تھی

(اقبال عظیم)

بہزاد لکھنوی

دیوانہ بنانا ہے تو دیوانہ بنا دے
ورنہ کہیں تقدیر تماشہ نہ بنا دے

اے دیکھنے والو مجھے ہنس ہنس کے نہ دیکھو
تم کو بھی محبت کہیں مجھ سا نہ بنا دے

میں ڈھونڈ رہا ہوں میری وہ شمع کہاں ہے
جو بزم کی ہر چیز کو پروانہ بنا دے

آخر کوئی صورت بھی تو ہو خانۂ دل کی
کعبہ نہیں بنتا ہے تو بت خانہ بنا دے

بہزاد ہر اک گام پہ اک سجدہء مستی
ہر ذرے کو سنگِ درِ جاناناں بنا دے

احمد فراز

غیر سے تیرا آشنا ہونا
گویا اچھا ہوا برا ہونا

خودنگوں سار، ہمسفر بیزار
اک ستم ہے شکستہ پا ہونا

کتنی جانکاہ ہے ضمیر کی موت
کتنا آساں ہے بیوفا ہونا

نشۂ لذتِ گناہ کے بعد
سخت مشکل ہے پارسا ہونا

آدمی کو خدا نہ دکھلائے
آدمی کا کبھی خدا ہونا

دل کی باتوں پہ کون جائے فراز
ایسے دشمن کا دوست کیا ہونا

امجد اسلام امجد

در کائنات جو وا کرے اسی آگہی کی تلاش ہے
مجھے روشنی کی تلاش تھی مجھے روشنی کی تلاش ہے

غم زندگی کے فشار میں تری آرزو کے غبار میں
اسی بے حسی کے حصار میں مجھے زندگی کی تلاش ہے

یہ جو سرسری سی نشاط ہے یہ تو چند لمحوں کی بات ہے
مری روح تک جو اتر سکے مجھے اس خوشی کی تلاش ہے

یہ جو آگ سی ہے دبی دبی نہیں دوستو مرے کام کی
وہ جو ایک آن میں پھونک دے اسی شعلگی کی تلاش ہے

یہ جو ساختہ سے ہیں قہقہے مرے دل کو لگتے ہیں بوجھ سے
وہ جو اپنے آپ میں مست ہو مجھے اس ہنسی کی تلاش ہے

یہ جو میل جول کی بات ہے یہ جو مجلسی سی حیات ہے
مجھے اس سے کوئی غرض نہیں مجھے دوستی کی تلاش ہے