قتیل شفائی
حقیقت کا اگر افسانہ بن جائے تو کیا کیجئے
گلے مل کر بھی وہ بیگانہ بن جائے تو کیا کیجئے
ہمیں سو بار ترکِ مے کشی منظور ہے لیکن
نظر اس کی اگر میخانہ بن جائے تو کیا کیجئے
نظر آتا ہے سجدے میں جو اکثر شیخ صاحب کو
وہ جلوہ، جلوۂ جانانہ بن جائے تو کیا کیجئے
ترے ملنے سے جو مجھ کو ہمیشہ منع کرتا ہے
اگر وہ بھی ترا دیوانہ بن جائے تو کیا کیجئے
خدا کا گھر سمجھ رکّھا ہے اب تک ہم نے جس دل کو
قتیل اس میں بھی اک بُتخانہ بن جائے تو کیا کیجئے
۔۔۔۔۔۔۔۔۔۔۔۔۔
No comments:
Post a Comment