نخشب جارچوی

کبھی تم نے بھی یہ سوچا کہ ہم فریاد کیا کرتے
تمہارا دل دکھا کر  اپنے  دل  کو  شاد  کیا  کرتے

مری بربادیوں پر ہنسنے والو  یہ تو  سمجھا  دو
جو  مل جاتا  تمہیں کو یہ  دل  برباد  کیا  کرتے

نگاہِ   یاس  میں  جب  نالۂ  خاموش  پنہاں  ہے
تو پھر ہونٹوں کو ہم  شرمندۂ  فریاد  کیا  کرتے

دمِ آخر بھی اے  دل خود  فریبی ہچکیاں کیسی
جو دانستہ بھلا بیٹھے وہ تجھ کو  یاد کیا کرتے

مجھے دیکھا  تو  ہر  اک نے انہیں جلاد  ٹھہرایا
انہیں دیکھا تو  بولے  یہ  بھلا  بیداد  کیا  کرتے

زمانہ جانتا  ہے حضرت  نخشبؔ  کی خود  داری
خلافِ  عقل   ہے   وہ  آرزوئے    داد   کیا   کرتے

نخشبؔ جارچوی

نخشب جارچوی

وعدے کا اعتبار تو ہے واقعی مجھے
یہ اور بات ہے کہ ہنسی آ گئی مجھے

لائی ہے کس مقام پہ وارفتگی مجھے
محسوس ہو رہی ہے اب اپنی کمی مجھے

سمجھے ہیں وہ جنوں تو جنوں ہی سہی مجھے
دانستہ اب بدلنی پڑی زندگی مجھے

جلووں کی روشنی میں جو کھویا تھا پا گیا
تم سے نظر ملی تو محبت ملی مجھے

ماحول سازگار مزاج وفا نہ تھا
دنیا سے بچ کے ان کی نظر دیکھتی مجھے

یوں ربط و ضبط شوق بڑھایا بہ طرز نو
جیسے کہ پہلے ان سے محبت نہ تھی مجھے

نخشبؔ مٹایا جس نے وفاؤں کی آڑ میں
اس بے وفا سے پھر بھی محبت رہی مجھے

نخشبؔ جارچوی