سعود عثمانی

یہ دشتِ دل ہے'یہاں کوئی بھی نہیں آتا

سو ہم نےدفن یہیں سب خزانہ کردیا ہے

سعودعثمانی ۔۔۔!!!

آنس معین

میں اپنی ذات کی تنہائی میں مقید تھا

پھر اس چٹان میں اک پھول نے شگاف کیا

آنس معین

دوسطری

‏‎کچھ اہلِ ستم، کچھ اہلِ حشم مے خانہ گرانے آئے تھے..

دہلیز کو چوم کے چھوڑ دیا دیکھا کہ یہ پتھر بھاری ہے..

عبد الحمید عدم

کہتے ہیں عمر رفتہ کبھی لوٹتی نہیں 

جا مے کدے سے میری جوانی اٹھا کے لا 

عبد الحمید عدم

دوسطری

تا به زُلفِ سِیَهش دل بستم

از پریشانیِ عالَم رَستم

(ظهیرالدین محمد بابُر)

جُوں ہی میں نے اُس کی زُلفِ سیاہ سے دل باندھا، مَیں پریشانیِ عالَم سے رَہا ہو گیا۔۔۔۔

ڈاکٹر خالد سہیل

محبت ایک بچے کا کھلونا

محبت ایک بوڑھے کا عصا ہے 

دوسطری

ﮐﻞ ﺑـﮯ ﻭﺟﮧ ﮐﺘﺎﺏ ﺳـﮯ ﭼﮩﺮﮮ ﮐﻮ ﮈﮬﺎﻧﭗ ﮐﺮ

ﺗﺎ ﺩﯾــﺮ ﺗﯿﺮﯼ ﯾﺎﺩ ﻣﯿﮟ ﺑﯿﭩﮭﺎ ﺭﮬﺎ ﮐﻮﺋﯽ...!!

مرزا عبدالقادر بیدل

مستغنی از گل است مزارِ شهیدِ عشق

ای  غنچه لب ‌، تو بر سرِ خاکم بیا بخند

(بیدل)

    " عشق کے شہید کا مزار پھول کا محتاج نہیں ھوتا ، اے کلی (جیسے تنگ ) منھ والے ! میری قبر پہ آکے ھنس دے "

جہان ملک خاتون

به خُدایی که جُز او نیست خُداوندِ جهان

که مرا عشقِ تو شد در همه دم هم‌دمِ جان

(جهان‌ملِک خاتون)

اُس خُدا کی قسم کہ جِس کے بجُز [کوئی] خُداوندِ جہان نہیں ہے!۔۔۔ کہ تمہارا عشق ہر دم میری جان کا ہم‌دم ہو گیا [ہے]۔۔۔

حیدر علی آتش

عدم سے دہر میں آنا کسے گوارا تھا 

کشاں کشاں مجھے لائی ہے آرزو تیری 

۔۔۔۔۔۔

حیدر علی آتش

شیخ یعقوب صرفی

گرچه دانم که به وصلِ تو رسیدن نتَوان

لیکن از راهِ طلب پای کشیدن نتَوان

(شیخ یعقوب صَرفی کشمیری)

اگرچہ میں جانتا ہوں کہ تمہارے وصل تک نہیں پہنچا جا سکتا۔۔۔ لیکن راہِ طلب سے پاؤں نہیں کھینچا جا سکتا۔۔۔

خلیل الرحمٰن اعظمی

نہ جانے کس کی ہمیں عمر بھر تلاش رہی 

جسے قریب سے دیکھا وہ دوسرا نکلا 

خلیل الرحمن اعظمی 

تیمور حسن تیمور

تیمور  اپنے درد کا احساس تب ہوا 

جب اس نے یہ کہا کہ بتانا تو تھا مجھے

 

دو سطری

تُمھارے حق میں کوئی فیصلہ ھُوا ھوگا

جو یہ نظام تُمھیں مُنصفانہ لگتا ھے

خواجہ وزیر لکھنوی

اسی خاطر تو قتل عاشقاں سے منع کرتے تھے

اکیلے پھر رے ہو یوسف بے کارواں ہو کر

(خواجہ وزیر لکھنوی)

سید علی مطہر اشعر

کوئی ابہام نہ رہ جائے سماعت کے لئے
بات کی جائے تو تصویر بنا دی جائے
وہ بھی مجرم ہے بغاوت نہیں کی ہے جس نے
اس کو نا کردہ گناہی کی سزا دی جائے
ساری بستی کو پرکھنا تو مناسب بھی نہیں
ایک دروازے کی زنجیر ہلا دی جائے
ہاتھ جب اٹھ ہی گئے ہیں تو بلا اِستثناء
اس ستم گر کو بھی جینے کی دعا دی جائے
دم بھی گھٹ جائے تو پندار کی تذلیل نہ ہو
روزنِ در سے کسی کو نہ صدا دی جائے
میری آواز بھی اب اُس پہ گراں ہے اشعرؔ
آسماں تک کوئی دیوار اٹھا دی جائے

سید علی مطہر اشعر

آزاد نظم

زبانوں کا بوسہ

زبانوں کے رس میں یہ کیسی مہک ہے!
یہ بوسہ کہ جس سے محبت کی اُٹھتی ہے خوشبو
یہ بدمست خوشبو جو گہرا، غنودہ نشہ لا رہی ہے
یہ کیسا نشہ ہے!
مرے ذہن کے ریزے ریزے میں اک آنکھ سی کھل گئی ہے
تم اپنی زباں میرے منہ میں رکھے,
جیسے پاتال سے میری جاں کھینچتے ہو,,
یہ بھیگا ہوا گرم و تاریک بوسہ
اماوس کی کالی برستی ہوئی رات جیسے اُمڈتی چلی آ رہی ہے

ریاض ملک

اکبر الہ آبادی

تیار تھے نماز پہ ہم سن کے زکر حور
جلوہ بتوں کا دیکھ کے نیت بدل گئی
اکبر الہ آبادی

شہزاد احمد

فصل گل خاک ہوئی جب تو صدا دی تو نے

اے گل تازہ بہت دیر لگا دی تو نے

کوئی صورت بھی رہائی کی نہیں رہنے دی

ایسی دیوار پہ دیوار بنا دی تو نے

فارسی

بے تو بُوئے گُل مرا دودِ کبابِ بُلبُل است
جلوۂ شبنم، نمک پاشیدنِ زخمِ گُل است

تیرے بغیر، میرے لئے پھولوں کی خوشبو ایسے ہے جیسے کے بلبل کے جلنے کی بُو، اور اوس کا گرنا ایسے ہے جیسے پھولوں کے زخموں پر نمک پاشی!

میثم علی آغا

تمہاری آنکھیں ، سمندر کے پانیوں سے بنی
تمہارے ھونٹ ، بنائے گئے گلابوں سے

”میثم علی آغا“

دو سطری

‏روک لیتاہوں توکہتی ہےکہ جانےدومجھے "

جانےدیتاہوں توکہتی ہےیہی چاہت تھی ؟

دوسطری

میرے لئے تو یہ بھی اذیت کی بات تھی

تجھ کو بھی دل کا حال سنانا پڑا مجھے

ساحر لدھیانوی

خون پھر خون ہے

ظلم پھر ظلم ہے، بڑھتا ہے تو مٹ جاتا ہے
خون پھر خون ہے، ٹپکے گا تو جم جائے گا

خاکِ صحرا پہ جمے یا کفِ قاتل پہ جمے
فرقِ انصاف پہ یا پائے سلاسل پہ جمے
تیغِ بیداد پہ، یا لاشہ بسمل پہ جمے
خون پھر خون ہے، ٹپکے گا تو جم جائے گا

لاکھ بیٹھے کوئی چھپ چھپ کے کمیں گاہوں میں
خون خود دیتا ہے جلادوں‌کے مسکن کا سراغ
سازشیں لاکھ اوڑھاتی رہیں ظلمت کا نقاب
لے کے ہر بوند نکلتی ہے ہتھیلی پہ چراغ

تم نے جس خون کو مقتل میں دبانا چاہا
آج وہ کوچہ و بازار میں آنکلا ہے
کہیں شعلہ، کہیں نعرہ، کہیں پتھر بن کر
خون چلتا ہے تو رکتا نہیں سنگینوں‌سے
سر اٹھاتا ہے تو دبتا نہیں آئینوں‌ سے

ظلم کی بات ہی کیا، ظلم کی اوقات ہی کیا
ظلم بس ظلم ہے آغاز سے انجام تلک
خون پھر خون ہے، سو شکل بدل سکتا ہے
ایسی شکلیں کہ مٹاؤ تو مٹائے نہ بنے
ایسے شعلے کہ بجھاؤ تو بجھائے نہ بنے
ایسے نعرے کہ دباؤ تو دبائے نہ بنے

ساحر لدھیانوی​

عاشق اصفہانی

برائے خاطرِ بیگانگاں خطا کردی
کہ ترکِ صحبتِ یارانِ آشنا کردی

تُو نے بیگانوں کی خاطر (خاطرِ طبع) کیلیئے خطا کی کہ یارانِ آشنا کی صحبت ترک کر دی۔

خُوشَم کہ ذوقِ شکارَم نرَفت از دلِ تو
ہزار بار مرا بستی و رہا کردی

میں خوش ہوں کہ میرے شکار کا ذوق تیرے دل سے نہیں گیا کہ ہزار بار تو نے مجھے قید کیا اور ہزار بار رہا۔

(عاشق اصفہانی)

حافظ

وفا کنیم و ملامت کشیم و خوش باشیم
کہ در طریقتِ ما کافری ست رنجیدن

ہم وفا کرتے ہیں، ملامت سہتے ہیں اور خوش رہتے ہیں کہ ہماری طریقت میں رنجیدہ ہونا کفر ہے۔

بہ پیرِ میکدہ گفتم کہ چیست راہِ نجات
بخواست جامِ مے و گفت بادہ نوشیدن

میں نے پیرِ میکدہ سے پوچھا کہ راہ نجات کیا ہے، اس نے جامِ مے منگوایا اور کہا مے پینا۔

مَبوس جُز لبِ معشوق و جامِ مے حافظ
کہ دستِ زہد فروشاں خطاست بوسیدن

اے حافظ محبوب کے لب اور مے کے جام کے سوا کسی کا بوسہ نہ لے کہ پارسائی بیچنے والے زاہدوں کا ہاتھ چومنا خطا ہے۔

(حافظ شیرازی)

حافظ

زاں پیشتر کہ عالَمِ فانی شَوَد خراب
ما را بہ جامِ بادۂ گلگوں خراب کُن

(حافظ شیرازی)

منظوم ترجمہ ڈاکٹر خالد حمید

قبل اس کے سارا عالَمِ فانی خراب ہو
مجھ کو بہ جامِ بادۂ گلگوں خراب کر

حافظ

آن دم کہ دل بہ عشق دہی خوش دمے بود
درکارِ خیر حاجتِ ہیچ استخارہ نیست
(حافظ شیرازی)

جب دل کو عشق میں لگا دیا، وہی اچھا وقت ہو گا
کارِ خیر میں کسی استخارہ کی ضرورت نہیں ہے

حافظ

عَلی الصباح چُو مردم بہ کاروبار رَوند
بلا کشانِ محبّت بہ کوئے یار روند

(حافظ شیرازی)

صبح صبح جیسے لوگ اپنے اپنے کاروبار کی طرف جاتے ہیں، محبت کا دکھ اٹھانے والے (عشاق) دوست کے کوچے کی طرف جاتے ہیں۔

قطعہ

ہر گز مجھے قبول نہیں ضد تری کہ میں
خود داریوں کو بیچ کر پاس وفا کروں

یہ سر مجھے عزیز ہے عزت کی حد تلک
عزت نہیں تو سر کا میں گردن پہ کیا کروں

عزیز قیسی

آپ کو دیکھ کر دیکھتا رہ گیا
کیا کہوں اور کہنے کو کیا رہ گیا

بات کیا ہے کہ سب غرقِ دریا ہوئے
اِک خدا رہ گیا ناخدا رہ گیا

سوچ کر آؤ کوئے تمنا ہے یہ
جانِ من جو یہاں رہ گیا رہ گیا

دل کے وحشت سرا سے خدا جانے کیوں
سب گئے ایک داغِ وفا رہ گیا

ان کی آنکھوں سے کیسے چھلکنے لگا
میرے ہونٹوں پہ جو ماجرا رہ گیا

ایسے بچھڑے سبھی رات کے موڑ پر
آخری ہمفسر راستہ رہ گیا

۔۔۔۔۔۔۔۔۔۔۔۔۔۔۔
عزیز قیسی

امیر خسرو

دلم در عاشقی آوارہ شُد، آوارہ تر بادا

تَنم از بیدِلی بیچارہ شد، بیچارہ تر بادا

مرا دل عشق میں آوارہ ہے، آوارہ تر ہو جائے

مرا تن غم سے بے چارہ ہوا، بے چارہ تر ہو جائے

گر اے زاہد دعائے خیر می گوئی مرا ایں گو

کہ آں آوارہء کوئے بتاں، آوارہ تر بادا

اگر مجھ کو دعائے خیر دینی ہے تو کہہ زاہد

کہ وہ آوارۂ کوئے بتاں آوارہ تر ہو جائے

دلِ من پارہ گشت از غم نہ زانگونہ کہ بہ گردد

اگر جاناں بدیں شاد است، یا رب پارہ تر بادا

مرا دل پارہ پارہ ہے، نہیں امّید بہتر ہو

اگر جاناں اسی میں شاد ہے تو پارہ تر ہو جائے

ہمہ گویند کز خونخواریش خلقے بجاں آمد

من ایں گویم کہ بہرِ جانِ من خونخوارہ تر بادا

سبھی کہتے ہیں خونخواری سے اُسکی خلق عاجز ہے

میں کہتا ہوں وہ میری جان پر خونخوارہ تر ہو جائے

چو با تر دامنی خو کرد خسرو با دوچشمِ تر

بہ آبِ چشمِ مژگاں دامنش ہموارہ تر بادا

دو چشمِ تر سے خسرو کو ہوئی تر دامنی کی خُو

برستی آنکھ سے دامن مگر ہموارہ تر ہو جائے

اعزاز احمد آذر

خود اپنی ذات سے اب تک مصالحت نہ ہوئی
چلے سفر پہ تو گھر کو مراجعت نہ ہوئی

کوئی بھی پہل نہ کرنے کی ٹھان بیٹھا تھا
انا پرست تھے دونوں، مفاہمت نہ ہوئی

وہ شخص اچھالگا اُس سے صاف کہہ ڈالا
یہ دل کی بات تھی ہم سے منافقت نہ ہوئی

زباں سے کہنا پڑا جو نہ کہنا چاہا تھا
وفا کی بات اشاروں کی معرفت نہ ہوئی

لُٹا کے بیٹھے ہیں نیندیں، گنوا کے چین آذر
یہ کار وبار ہی ایسا تھا کچھ بچت نہ ہوئی

وحشی بافقی

به غم کسی اسیرم که ز من خبر ندارد
عجب از محبت من که در او اثر ندارد

غلط است هر که گوید که به دل رهست دل را
دل من ز غصه خون شد دل او خبر ندارد

وحشی بافقی

دو سطری

اس معرکے میں  عشق بیچارہ کرے گا کیا

خود حسن کو ہیں جان کے لالے پڑے ہوئے

امیر مینائی

امیر مینائی

بات رکھ لی مری قاتل نے گنہگاروں میں
اس گنہ پر مجھے مارا کہ گنہگار نہ تھا

افتخار حیدر

دن بھر اس کی یاد کا شربت پینے سے پرہیز کیا
شام ڈھلے تک روزہ رکھا رات گئے افطاری کی

افتخار حیدر

عدیم ہاشمی

کیوں پرکھتے ہو سوالوں سے جوابوں کو عدیمؔ
ہونٹ اچھے ہوں تو سمجھو کہ سوال اچھا ہے
عدیم ہاشمی

دوسطری

کہا تھا کس نے کہ عہدِ وفا کرو اُس سے
جو یوں کیا ہے تو پھر کیوں گلہ کرو اُس سے

شوکت فہمی

دستِ  ضروریات  میں  بٹتا  چلا  گیا
میں بے پناہ شخص تھا، گھٹتا چلا گیا

پیچھے ہٹا میں راستہ دینے کے واسطے
پھر یوں  ہوا  کہ  راہ  سے  ہٹتا چلا  گیا

عجلت تھی اس قدر کہ میں کچھ بھی پڑھے بغیر
اوراق   زندگی   کے   پلٹتا   چلا   گیا

جتنی  زیادہ  آگہی  بڑھتی  گئی   مری
اتنا   درونِ   ذات   سمٹتا   چلا   گیا

کچھ دھوپ زندگی کی بھی بڑھتی چلی گئی
اور کچھ خیالِ یار بھی چھٹتا چلا گیا

اجڑے ہوئے مکان میں کل شب ترا خیال
آسیب  بن  کے  مجھ  سے  لپٹتا چلا  گیا

اس  سے  تعلقات  بڑھانے  کی  چاہ  میں
فہمی  میں اپنے  آپ سے  کٹتا  چلا  گیا

(شوکت فہمی)

مظفر وارثی

میری خوشبو کو نہ راس آئی ہوا کی دوستی
میں گلی کوچوں میں رسوا تھا مگر اتنا نہ تھا

مظفر وارثی

سیماب اکبر آبادی

مجھ سے ملنے کے وہ کرتا تھا بہانے کتنے
اب گزارے گا مرے ساتھ زمانے کتنے
میں گرا تھا تو بہت لوگ رکے تھے لیکن،
سوچتا ہوں مجھے آئے تھے اٹھانے کتنے
جس طرح میں نے تجھے اپنا بنا رکھا ہے،
سوچتے ہوں گے یہی بات نہ جانے کتنے
تم نیا زخم لگاؤ تمہیں اس سے کیا ہے،
بھرنے والے ہیں ابھی زخم پرانے کتنے
سیماب اکبر آبادی

بشیر فاروقی

دھوپ رکھ دی تھی مقدر نے سرہانے میرے
عمر بھر آگ  میں جلتے  رہے  شانے  میرے

میں ترے نام کا عامل ہوں، وہ اب جان گئے
حادثے اب نہیں ڈھونڈھیں گے ٹھکانے میرے

چاند سی ان کی وہ خوش رنگ قبا، وہ دستار
ان  کی  درویشی  پہ  قربان  خزانے  میرے

موج رنگ آئی کچھ اس طور کہ دل جھوم اٹھا
ہوش گم کر  دئے  سرمست  حنا نے  میرے

پھر کوئی لمس مرے جسم میں شعلے بھر دے
پھر سے  یوں ہو  کہ پلٹ آئیں زمانے میرے

جا، تجھے چھوڑ دیا اے غمِ دوراں میں نے
ورنہ خالی  نہیں جاتے  ہیں  نشانے  میرے

ایسا لگتا تھا کہ لوٹ آئے ہیں گزرے ہوئے دن
مل گئے تھے مجھے کچھ دوست پرانے میرے

زندگی! دیکھ لی میں نے تری دنیا، کہ جہاں
وقت  نے  چھین لیے  خواب سہانے  میرے

اب میں ساحل پہ نہیں، میں ہوں تہہِ آبِ رواں
شہر در شہر  ہیں  ہونٹوں  پہ فسانے  میرے

گر پڑا سیلِ حوادث  مرے  قدموں پہ  بشیر
ہاتھ  تھامے جو  بزرگوں کی  دعا نے  میرے

(بشیر فاروقی)

دو سطری

‏مرا خیال بھی گھنگرو پہن کے ناچے گا
اگر خیال کو تیرا خیال آ جائے

احمد ندیم قاسمی

احمد ندیم قاسمی

گلی کے موڑ پہ بچوں کے ایک جمگھٹ میں
کسی نے درد بھری لے میں ماہیا گایا
مجھے کسی سے محبت نہیں مگر اے دل
یہ کیا ہوا کہ تو بے اختیار بھر آیا

نعیم ضرار

مِرے گُناہ اگرچہ نہیں ہیں کم لیکن
یہ کیا ہیں رحمتِ پَروَردِگار کے آگے۔۔۔!

نعیم ضرار

دوسطری

ﮐﻮﻥ ﮐﺲ ﮐﯽ ﻣﺪﺩ ﮐﻮ ﺍٓﺗﺎ ﮨﮯ
ﻭﻗﺖ ﮨﮯ ﺧﻮﺩ ﮨﯽ ﺑﯿﺖ ﺟﺎﺗﺎ ﮨﮯ

رحمان فارس

ھمدم نہ ھو تو کیا بھلا پینے کا فائدہ ؟
بیٹھا ھُوں کب سے چائے کی دو پیالیوں کے ساتھ

رحمان فارس

دوسطری

غم ستائیں تو ترے لمس کا ترسا ہوا شخص
تیری تصویر سے گھبرا کے لپٹ جاتا ہے

عطا الحسن

رئیس فروغ

رئیس فروغ
حسن کو حسن بنانے میں مرا ہاتھ بھی ہے
آپ مجھ کو نظر انداز نہیں کرسکتے
عشق وہ کار مسلسل ہے کہ ہم اپنے لیے
ایک لمحہ بھی پس انداز نہیں کرسکتے

شان الحق حقی

چپ ہے وہ مہر بہ لب میں بھی رہوں اچھا ہے
ہلکا  ہلکا  یہ  محبت  کا  فسوں اچھا  ہے

موسمِ گل  نہ  سہی  شغلِ جنوں اچھا  ہے
ہمدمو !!  تیز  رہے  گردشِ  خوں، اچھا  ہے

تم بھی کرتے رہے تلقین سکوں کی خاطر
میں بھی آوارہ و  سرگشتہ رہوں اچھا ہے

وہ بھی کیا خون کہ ہو جبر کی بنیاد میں جذب
جو یوں ہی مفت میں بہہ جائے وہ خوں اچھا ہے

بات وہ آئی ہے لب پر کہ کہے بن نہ رہوں
عقل جامے سے ہو باہر  تو جنوں اچھا  ہے

گر بھٹکنے ہی کی ٹھانی ہے رفیقوں نے تو خیر
منہ سے کچھ کہہ نہ سکوں ساتھ تو دوں اچھا ہے

دل کا احوال کہ کچھ ذکرِ زمانہ چھیڑوں
بات یوں چھیڑنا اچھا ہے کہ، یوں اچھا ہے

میں نے کیا کیا نہ کہا شعر میں ان سے حقی
وہ فقط سن کے یہ کہتے رہے " ہوں اچھا ہے "

(شان الحق حقی)

رحمان فارس

🌹نذرِ جان ایلیا🌹

تُو میرے رُوکھے پن پر تلملا نئیں
مَیں جتنا بے مروّت اب ھُوں، تھا نئیں

خوشی بےحد سُہانی کیفیت ھے
مگر غم سے زیادہ دیرپا نئیں

مِرے اشکوں کو مت بہلائیں، جائیں
یہ میرا مسئلہ ھے، آپ کا نئیں

تو کیا تیرا نہیں ھے تیرا مُنکر ؟
تو کیا تُو اپنے مُنکر کا خُدا نئیں ؟

چلو مانا نہیں جَون ایلیا مَیں
مگر تُو بھی تو کوئی فارھہ نئیں

“محبت ھوگئی” کہنا غلط ھے
محبت زندگی ھے، واقعہ نئیں

مُجھے الزام مت دے، بنتِ حوّا !
مَیں آدم ھُوں، فرشتہ نئیں، خُدا نئیں

یہی ھے داستانِ وصلِ جاناں
کہ کچھ کچھ تو ھُوا، کچھ کچھ ھُوا نئیں

تکلّف چھوڑ فارس ! پاؤں پڑ جا
ابھی وہ جانے والا ھے، گیا نئیں

رحمان فارس

پیر نصیرالدین نصیر گولڑوی رحمۃ اللہ علیہ

قیس و فرہاد کو یک گو نہ رہا مجھ سے خلوص
جب بھی دیکھا تو پکار اٹھے کہ استاد آیا

وہ بھی ملتا جو گلے سے تو خوشی عید کی تھی
کوئی رہ رہ کے نصیر آج بہت یاد آیا

سرائیکی

ایویں قسماں نہ کھا ماہیا،
گھڑی وچ بَدل ویندیں،
کوئی کرے کیا وسا ماہیا،

سید شمس الدین گیلانی

عرفان صدیقی

دل کا جو حال ہوا دشمنِ جانی کا نہ ہو
آخرِ شب کبھی آغاز کہانی کا نہ ہو

کون مانے گا کہ گزرے ہوئے موسم کیا تھے
جب قبا پر کوئی پیوند نشانی کا نہ ہو

عرفان صدیقی

احمد فراز

مزاج ہم سے زیادہ جدا نہ تھا اس کا
جب اپنے طور یہی تھے تو کیا گلہ اس کا

وہ اپنے زعم میں تھا بے خبر رہا مجھ سے
اسے گماں بھی نہیں میں نہیں رہا اس کا

وہ برق رو تھا مگر وہ گیا کہاں جانے
اب انتظار کریں گے شکستہ پا اس کا

چلو یہ سیل بلا خیز ہی بنے اپنا
سفینہ اس کا خدا اس کا ناخدا اس کا

یہ اہل درد بھی کس کی دہائی دیتے ہیں
وہ چپ بھی ہو تو زمانہ ہے ہم نوا اس کا

ہمیں نے ترک تعلق میں پہل کی کہ فرازؔ
وہ چاہتا تھا مگر حوصلہ نہ تھا اس کا

آزاد نظم

کئی دنوں سے
مجھے وہ میسج میں لکھ رہی تھی
جنابِ عالی
حضورِ والا
بس اِک منٹ مجھ سے بات کر لیں
میں اِک منٹ سے اگر تجاوز کروں
تو بے شک نہ کال سننا
میں زیرِ لب مُسکرا کے لکھتا
بہت بزی ہوں
ابھی نئی نظم ہو رہی ہے
وہ اگلے میسج میں پھر یہ لکھتی
سسکتی روتی بلکتی نظموں کے عمدہ شاعر
تم اپنی نظمیں تراشو لیکن
کبھی تو میری طرف بھی دیکھو
کبھی تو مجھ سے بھی بات کر لو
بس اِک منٹ میری بات سُن لو
میں ہنس کے لکھتا
فضول لڑکی
بہت بزی ہوں
بس اِک منٹ ہی تو ہے نہیں ناں
وہ کئی دنوں تک خموش رہتی
پھر ایک دن میں نے اُس کی حالت پہ رحم کھا کر
جواب لکھا
بس اِک منٹ ہے
اور اِک منٹ سے زیادہ بالکل نہیں سنوں گا
تو اس نے اوکے لکھا اور اِک دم سے کال کر دی
میں کال پِک کر کے چُپ کھڑا تھا
وہ گہرا لمبا سا سانس لے کر
اُداس لہجے میں بولی سر جی
میں جانتی ہوں کہ اِک منٹ ہے
اور اِک منٹ میں
میں اپنے اندر کی ساری باتیں کسی بھی صورت نہ کہہ سکوں گی
سلگتی ہجرت زدہ رُتوں کو اُداس نظموں میں لکھنے والے
عظیم شاعر
خُدا کی دھرتی پہ رہنے والے
اُداس لوگوں کا دُکھ بھی لکھنا
کبھی محبت میں جلتے لوگوں کا دُکھ سمجھنا
کبھی کسی نظم میں بتانا جنہیں تمہاری رفاقتیں ہی کبھی میسر نہیں ہوئی ہیں
جنہیں تمہاری محبتیں ہی کھبی میسر نہیں ہوئی ہیں
کبھی جو محرومیوں کے موسم بہت ستائیں تو کیا کریں وہ
کبھی جو تنہائیوں کی شامیں بہت رُلائیں تو کیا کریں وہ
ابھی تو آدھا منٹ پڑا تھا
مگر وہ لائن سے ہٹ چکی تھی
وہ اِک منٹ کی جو کال تھی ناں
وہ تیس سیکنڈ میں کٹ چکی تھی
میں کتنے برسوں سے اگلا آدھا منٹ گزرنے کا منتظر ہوں
وہ نرم لیکن اُداس لہجے میں بات کرتی
اُداس لڑکی مِری سماعت کے
اَدھ کھلے دَر سے یونہی اب تک لگی ہوئی  ہے
ہٹی نہیں ہے
بہت سے سالوں سے چل رہی ہے
وہ کال اب تک کٹی نہیں ہے

دوسطری

شعر کہنے میں اِک خرابی ہے
لوگ آہوں پہ واہ کرتے ہیں

دوسطری

عالم میں اب تلک بھی مذکور ہے ہمارا
افسانہ محبت مشہور ہے ہمارا

امجد اسلام امجد

اب  تک  نہ  کُھل  سکا  کہ مرے رُوبَرُو ہے کَون
کِس   سے   مَکالَمَہ   ہے   پسِ  گُفتگُو   ہے  کَون

سایہ   اگر   ہے   وہ  تو  ہے  اُس  کا  بَدن  کہاں
مَرکز  اگر  ہُوں  میں  تو  مرے چار سُو ہے کَون

ہر  شے  کی  ماہِیَّت  پہ  جو  کرتا  ہے  تُو سوال
تُجھ  سے  اگر یہ پوچھ لے کوئی کہ تُو ہے کون

اَشّکوں  میں  جِھلمِلاتا  ہوا  کس  کا  عَکس  ہے
تاروں   کی   رَہگُزر   میں   یہ  ماہ  رو  ہے  کَون

باہر  کبھی  تو  جھانک  کے کھڑکی سے دیکھتے
کس   کو   پکارتا   ہوا   یہ  کو  بہ  کو  ہے  کَون

آنکھوں   میں   رات  آ   گئی   لیکِن  نہیں  کُھلا
میں  کِس  کا  مدّعا ہوں؟ مری جُستُجُو ہے کَون

کِس   کی   نگاہِ   لُطف  نے   موسم   بدل  دئیے
فصلِ  خزاں  کی  راہ  میں  یہ  مُشکبو  ہے کَون

بادَل  کی  اوٹ  سے  کبھی  تاروں  کی  آڑ  سے
چُھپ چُھپ کے دیکھتا ہوا یہ حیلہ جُو ہے کَون

تارے  ہیں  آسماں  میں  جیسے  زمیں  پہ  لوگ
ہر  چند  ایک  سے   ہیں  مگر  ہُو  بَہُو  ہے  کَون

ہونا   تو   چاہیے   کہ   یہ   میرا  ہی  عَکس  ہو
لیکِن   یہ   آئینے   میں   مرے   رُوبَرُو  ہے  کَون

اس   بے    کنار    پھیلی    ہوئی   کائنات   میں
کِس  کو  خبر ہے  کَون ہُوں میں! اور تُو ہے کَون

سارا   فَساد   بڑھتی   ہوئی   خواہِشوں   کا  ہے
دل  سے  بڑا  جہان   میں  امجدؔ  عدُو  ہے  کَون

امجد اسلام امجدؔ

نامعلوم

‏ہم کسی کام کے نہیں ورنہ
وہ کسی کام سے  ہی آ جاتا

عابی مکھنوی

پتھر سارے زنداں کی دیوار میں چُن کر حاکم نے !
پاگل کُتے چھوڑ رکھے ہیں ہم سب کی رکھوالی کو
۔۔۔۔
عابی مکھنوی

رحمان فارس

چلا تو آیا ھُوں مَیں، آگے جو مِری قسمت
وہ در مرے لیے وا ھو نہ ھو، مِری قسمت

تُمہیں بسایا تھا دل میں، تُم آستیں میں رھے
تمہارا دوش نہیں دوستو ! مِری قسمت

اگر مَیں شہد خریدُوں تو کڑوا نکلے گا
تُم اتنی بات سے ھی جان لو مِری قسمت

تھمائی کاتبِ تقدیر کو لہُو کی دوات
پھر اُس سے مَیں نے کہا: اب لکھو مِری قسمت

تُو لکھ کے لایا تھا سکّے کے دونوں رُخ مری ھار
مَیں پھر بھی جیت گیا یار تو مِری قسمت

وہ شخص آیا نہیں، آنکھیں مُند گئیں میری
عزیزو ! دوستو ! نوحہ گرو ! مِری قسمت

مرا بھی مُلکِ محبت پہ راج ھو فارس
اگر جناب کی قسمت سی ھو مِری قسمت

رحمان فارس

اتباف ابرک

اپنے ہو کر بھی جو نہیں ملتے
دل یہ جا کر ہیں کیوں وہیں ملتے

یہاں ملتی نہیں ہیں تعبیریں
ہاں مگر خواب ہیں حسیں ملتے

ہم کو مانگا نہیں گیا دل سے
کیسے ممکن تھا ہم نہیں ملتے

یونہی بے کار ہر تلاش گئی
وہ نہیں تو چلو، ہمیں ملتے

یہ قیامت تو بس دلاسہ ہے
ملنا ہوتا انہیں یہیں ملتے

لازماً سب قصور میرا ہے
لوگ تو سب ہیں بہتریں ملتے

روز اپنے سے اعتبار اٹھے
روز وعدے ہیں پُر یقیں ملتے

توبہ کتنی سمٹ گئی دنیا
ایک گھر کے نہیں مکیں ملتے

کاہے تکتی ہے آسمانوں کو
چاند تارے نہیں زمیں ملتے

سارے قصے میں وہ رہے میرے
اب ہے انجام تو نہیں ملتے

تم سے ملتے گلی گلی ، ابرک
ہم سے جوہر کہیں کہیں ملتے

۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔۔اتباف ابرک

نامعلوم

آپ کو کیا خبر محبت کی
ہونے والوں کو ہو گئی ہو گی

عشق پانی پہ چل رہا ہو گا
عقل کشتی بنا رہی ہو گی

تہذیب حافی

‎بڑا پُر فریب ہے شہد و شِیر کا ذائقہ
‎مگر ان لبوں سے ترا نمک تو نہیں گیا

‎یہ جو اتنے پیار سے دیکھتا ہے تُو آج کل
‎مرے دوست تُو کہیں مجھ سے تھک تو نہیں گیا

حافی

دوسطری

‏جانے کس وقت اچانک اُسے یاد آ جائے..!!
میں نے یہ سوچ کےنمبر نہیں بدلا اپنا..!!

(عادل لکھنوی)

افتخار عارف

خوابِ دیرینہ سے رخصت کا سبب پوچھتے ہیں
چلیے پہلے نہیں پوچھا تھا تو اب پوچھتے ہیں

کیسے خوش طبع ہیں اس شہرِ دل آزار کے لوگ
موجِ خوں سر سے گزر جاتی ہے تب پوچھتے ہیں

اہلِ دنیا کا تو کیا ذکر کہ دیوانوں کو
صاحبانِ دلِ شوریدہ بھی کب پوچھتے ہیں

خاک اُڑاتی ہوئی راتیں ہوں کہ بھیگے ہوئے دن
اوّلِ صبح کے غم آخرِ شب پوچھتے ہیں

ایک ہم ہی تو نہیں ہیں جو اُٹھاتے ہیں سوال
جتنے ہیں خاک بسر شہر کے سب پوچھتے ہیں

یہی مجبور، یہی مہر بلب، بے آواز
پوچھنے پر کبھی آئیں تو غضب پوچھتے ہیں

کرمِ مسند و منبر کہ اب اربابِ حَکَم
ظلم کر چکتے ہیں تب مرضیِ رب پوچھتے ہیں

عائشہ ایوب

جھکتی پلکوں کی احتیاط سمجھ
خامشی کر رہی ہے بات سمجھ

اک جھلک جس نے دیکھنا ہے تجھے
اُس کی آنکھوں کی مشکلات سمجھ

عائشہ ایوب

اظہر ناظر

میں پرستِش کی حد سے لوٹا ہُوں
اب مُحبّت __ فضُول لگتی ہے
.....
وہ مانگتا ہے مجھ سے چاہت کے ثبوت اب بھی
اب تک کی پرستش کو وہ خاطر میں نہیں لاتا

(اظہر ناظؔر)

فرحت عباس شاہ

کم تو پہلے بھی نہیں تھا مگر اے بِچھڑے ہُوئے
بڑھ گیا اور تِرے غم کا اثر بارش میں۔۔۔!

فرحتؔ عبّاس شاہ

احمد فراز

ایک دیوانہ یہ کہتے ہوئے ہنستا جاتا
کاش منزل سے بھی آگے کوئی رستا جاتا

اے میرے ابر گریزاں مری آنکھوں کی طرح
گر برسنا ہی تجھے تھا تو برستا جاتا

آج تک یاد ہے اظہار محبت کا وہ پل
کہ مری بات کی لکنت پہ وہ ہنستا جاتا

اتنے محدود کرم سے تو تغافل بہتر
گر ترسنا ہی مجھے تھا تو ترستا جاتا

احمد فراز

جمال احسانی

قرار دل کو سدا جس کے نام سے آیا
وہ آیا بھی تو کسی اور کام سے آیا
جمال احسانی

شاکر شجاع آبادی

جے تنگ ہوویں ساڈی ذات کولوں
تے صاف دسیں تیڈی جان چھٹے

رب توں منگی ضائع نئی تھیندی
منگ ڈیکھ دعا تیڈی جان چھٹے

تیکو پیار کیتا تیڈا مجرم ہاں
ڈے سخت سزا تیڈی جان چھٹے

ایویں مار نہ شاکِر قسطاں وچ
یک مُشت مُکا تیڈی جان چھٹے

جامی

قصّۂ سوزِ دلِ پروانہ را از شمع پُرس
شرحِ ایں آتش نداند جز زبانے سوختہ

مولانا عبدالرحمٰن جامی

پروانے کے سوزِ دل کا قصہ شمع سے پُوچھ کہ اِس آگ (اور جلنے) کی شرح کسی جلے ہوئے کی زبان کے علاوہ کوئی بھی نہیں جانتا۔