استاد دامن

دَس کھاں شہر لہور اندر، کنِے بُوہے تے کنِیاں بارِیاں نیں؟
نالے دَس کھاں اوتھوں دِیاں اِٹاں، کنِیاں ٹٹُیاں تے کنِیاں سارِیاں نیں؟
دَس کھاں شہر لہور اندر کھُوہیاں کنِیاں مٹِھیاں تے کنِیاں کھارِیاں نیں؟
ذرا سوچ کے دیویں جواب مینوں، اوتھے کنِیاں ویاہیاں تے کنِیاں کنواریاں نیں؟

دَساں میں شہر لہور اندر، لکھاں بُوہے تے لکھاں ای بارِیاں نیں!
جنِہاں اِٹاں تے دھر گئے پیر عاشق، اوہی او ٹٹُیاں تے باقی سارِیاں نیں!
جنہاں کھُوہیاں توں بھرن معشوق پانی، اوہی او مٹِھیاں تے باقی کھارِیاں نیں!
تے جیہڑیاں بہندیاں اپنے نال سجناں دے، اوہی او ویاہیاں تے باقی کنواریاں نیں !

(استاد دامن)

احمد فراز

کروں نہ یاد مگر کس طرح بھلاؤں اسے
غزل بہا نہ کروں اور گنگناؤں اسے

وہ خار خار ہے شاخِ گلاب کی مانند
میں زخم زخم ہوں پھر بھی گلے لگاؤں اسے

یہ لوگ تذکرے کرتےہیں اپنے لوگوں کے
میں کیسے بات کروں،اب کہاں سے لاؤں اسے

مگر وہ زود فراموش ، زود رنج بھی ہے
کہ روٹھ جائے ، اگر یاد کچھ دلاؤں اسے

وہی جو دولتِ دل ہے وہی جو راحتِ جاں
تمہاری بات پہ اے ناصحو ، گنواؤں اسے

جو ہم سفر سرِ منزل بچھڑ رہا ہے فراز
عجب نہیں ہے اگر یاد بھی نہ آؤں اسے

دو سطری

چاند چہرہ حجاب آنکھیں ہیں

کتنی وہ لاجواب آنکھیں ہیں

مرزا رفیع سودا

بدلا ترے ستم کا کوئی تجھ سے کیا کرے
اپنا ہی تو فریفتہ ہووے خدا کرے
قاتل ہماری نعش کو تشہیر ہے ضرور
آئندہ تا کوئی نہ کسی سے وفا کرے
اتنا لکھائیو مرے لوحِ مزار پر
یاں تک نہ ذی حیات کو کوئی خفا کرے
بلبل کو خونِ گُل میں لٹایا کروں، مجھے
نالے کی گر چمن میں تُو رخصت دیا کرے
فکرِ معاش و عشقِ بتاں، یادِ رفتگاں
اس زندگی میں اب کوئی کیا کیا کِیا کرے
عالم کے بیچ پھر نہ رہے رسمِ عاشقی
گر نیم لب کوئی ترے شکوے سے واکرے
گر ہو شراب و خلوت و محبوبِ خوب رو
زاہد قسم ہے تجھ کو، جو تُو ہو تو کیا کرے؟
تعلیمِ گریہ دُوں اگر ابرِ بہار کو
جز لختِ دل صدف میں نہ گوہر بندھا کرے
تنہا نہ روزِ ہجر ہی سودا پہ ہے ستم
پروانہ ساں وصال کی ہر شب جلا کرے
(مرزا رفیع سودا)

اعتبار ساجد

کوئی کیسا ہمسفر ہے، یہ ابھی سے مت بتاؤ
ابھی کیا پتا کسی کا کہ چلی نہیں ہے ناؤ

یہ ضروری تو نہیں ہے کہ سدا رہیں مراسم
یہ سفر کی دوستی ہے اسے روگ مت بناؤ

مرے چارہ گر بہت ہیں، یہ خلش مگر ہے دل میں
کوئی ایسا ہو کہ جس کو،ہوں عزیز میرے گھاؤ

تمہیں آئینہ گری میں، ہے بہت کمال حاصل
مرا دل ہے کرچی کرچی، اسے جوڑ کر دکھاؤ

کوئی قیس تھا تو ہوگا، کوئی کوہکن تھا، ہوگا
مرے رنج مختلف ہیں، مجھے ان سے مت ملاؤ

مجھے کیا پڑی ہے ساجد کہ پرائی آگ مانگوں
میں غزل کا آدمی ہوں، مرے اپنے ہیں الاؤ

اعتبار ساجد

فردوس گیاوی

نہ میں یقین میں رکّھوں نہ تُو گمان میں رکھ
ہے سب کی بات تو پھر سب کے درمیان میں رکھ

وہ دھوپ میں جو رہے گا تو روپ کھو دے گا
چھپا لے سینے میں پلکوں کے سائبان میں رکھ

مرے  بدن  کو  تو. اپنے  بدن  کی آنچ  نہ دے
جو ہو سکے تو مری جان اپنی جان  میں رکھ

نہ  بیٹھنے  دے  کبھی  عزم  کے  پرندے  کو
اُڑان  بھول  نہ  جائے ، سدا  اُڑان  میں  رکھ

محبتیں  نہیں  ملتیں  محبتوں  کے  بغیر
اُسے نہ بھول تو فردوس اپنے دھیان میں رکھ

(فردوس گیاوی)

دو سطری

کِس نے بھیگے ہوئے بالوں سے یہ جھٹکا پانی۔
جُھوم  کے  آئی  گھٹا   ٹوٹ  کے  برسا  پانی۔

ابنِ انشاء

شامِ غم کی سحر نہیں ہوتی
یا ہمیں کوخبر نہیں ہوتی

ہم نے سب دکھ جہاں کے دیکھے ہیں
بے کلی اس قدر نہیں ہوتی

نالہ یوں نا رسا نہیں رہتا
آہ یوں بے اثر نہیں ہوتی

چاند ہے، کہکشاں ہے تارے ہیں
کوئی شے نامہ بر نہیں ہوتی

ایک جاں سوز و نامراد خلش
اس طرف ہے اُدھر نہیں ہوتی

دوستو، عشق ہے خطا لیکن
کیا خطا درگزر نہیں ہوتی

رات آکر گزر بھی جاتی ہے
اک ہماری سحر نہیں ہوتی

بے قراری سہی نہیں جاتی
زندگی مختصر نہیں ہوتی

ایک دن دیکھنے کو آجاتے
یہ ہوس عمر بھر نہیں ہوتی

حُسن سب کو خدا نہیں دیتا
ہر کسی کی نظر نہیں ہوتی

دل پیالہ نہیں گدائی کا
عاشقی در بہ در نہیں ہوتی

آنکھیں

اُس کی آنکھوں کا وہی رنگ ہے جھیلوں جیسا
خاص جرگوں میں___ قبائل کی دلیلوں جیسا

تیری صورت سے عالم میں بہاروں کو ثبات
تیری آنکھوں کے سوا دنیا میں رکھا کیا ہے

اکھیاں ہور کسے نوں کیوں ویکھن 
جدو کھوٹ ایمان اچ کوئی نہی....!
تیرے دل دیاں یار خدا جانے 
ساڈا ہور جہاں وچ کوئی نہیں

آپ کی آنکھیں اگر شعر سنانے لگ جائیں
ہم جو غزلیں لیے پھرتے ہیں ٹھکانے لگ جائیں

 
سنا ہے حشر ہیں اس کی غزال سی آنکھیں..
سنا ہے ہرن اسے دشت بھر کے دیکھتے ہیں...

اس کی آنکھیں بتاوں،کیسی ہیں؟
جھیل سیف الملوک جیسی ہیں

داغ

تو ہے مشہور دل آزار یہ کیا
تجھ پر آتا ہے مجھے پیار یہ کیا

جانتا ہوں کہ میری جان ہے تو
اور میں جان سے بیزار یہ کیا

پاؤں‌ پر اُنکے گِرا میں‌ تو کہا
دیکھ ہُشیار خبردار یہ کیا

تیری آنکھیں تو بہت اچھی ہیں
سب انہیں کہتے ہیں بیمار یہ کیا

کیوں مرے قتل سے انکار یہ کیوں
اسقدر ہے تمہیں دشوار یہ کیا

سر اُڑاتے ہیں وہ تلواروں سے
کوئی کہتا نہیں سرکار یہ کیا

ہاتھ آتی ہے متاعِ الفت
ہاتھ ملتے ہیں خریدار یہ کیا

خوبیاں کل تو بیاں ہوتی تھیں
آج ہے شکوۂ اغیار یہ کیا

لے لیے ہم نے لپٹ کر بوسے
وہ تو کہتے رہے ہر بار یہ کیا

وحشتِ دل کے سوا اُلفت میں
اور ہیں سینکڑوں آزار یہ کیا

ضعف رخصت نہیں دیتا افسوس
سامنے ہے درِ دلدار یہ کیا

باتیں سنیے تو پھڑک جائیے گا
گرم ہیں‌ داغ کے اشعار یہ کیا

بہزاد لکھنوی

دیوانہ بنانا ہے تو دیوانہ بنا دے
ورنہ کہیں تقدیر تماشہ نہ بنا دے

اے دیکھنے والو مجھے ہنس ہنس کے نہ دیکھو
تم کو بھی محبت کہیں مجھ سا نہ بنا دے

میں ڈھونڈ رہا ہوں میری وہ شمع کہاں ہے
جو بزم کی ہر چیز کو پروانہ بنا دے

آخر کوئی صورت بھی تو ہو خانۂ دل کی
کعبہ نہیں بنتا ہے تو بت خانہ بنا دے

بہزاد ہر اک گام پہ اک سجدہء مستی
ہر ذرے کو سنگِ درِ جاناناں بنا دے

داغ

(داغ دہلوی رحمتہ اللہ علیہ)​
​جب کہا اور بھی دنیا میں حسیں اچھے ہیں​
کیا ہی جھنجلا کے وہ بولے کہ ہمیں اچھے ہیں​
​
نہ اُٹھا خواب عدم سے ہمیں ہنگامہء حشر​
کہ پڑے چین سے ہم زیرِ زمیں اچھے ہیں​
​
کس بھروسے پہ کریں تجھ سے وفا کی اُمید​
کون سے ڈھنگ ترے جان حزیں اچھے ہیں​
​
خاک میں آہ ملا کر ہمیں، کیا پوچھتے ہو​
خیر جس طور میں ہم خاک نشیں اچھے ہیں​
​
ہم کو کوچے سے تمہارے نہ اُٹھائے اللہ​
صدقے بس خلد کے کچھ ہم تو یہیں اچھے ہیں​
​
نہ ملا خاک میں، تو ورنہ پشیماں ہوگا​
ظلم سہنے کو ہم اے چرخ بریں اچھے ہیں​
​
دل میں کیا خاک جگہ دوں ترے ارمانوں کو​
کہ مکاں ہے یہ خراب اور مکیں اچھے ہیں​
​
مجھ کو کہتے ہیں رقیبوں کی بُرائی سن کر​
وہ نہیں تم سے بُرے بلکہ کہیں اچھے ہیں​
​
بُت وہ کافر ہیں کہ اے داغ خدا اُن سے بچائے​
کون کہتا ہے یہ غارتگر دیں اچھے ہیں​

عدم

یوں ہی درست ہوگی طبیعت تری عدمؔ
کمبخت بھول جا کہ طبیعت اداس ہے
توبہ تو کر چکا ہوں مگر پھر بھی اے عدمؔ
تھوڑا سا زہر لا کہ طبیعت اداس ہے
.....
ہنس کے آپ جھوٹ بولتے ہیں
دل میں کتنی مٹھاس گھولتے ہیں
دنیا کتنی حسین لگتی ہے
آپ جب مسکرا کر بولتے ہیں
......
یہ سمجھ کے سچ جانا ہم نے تیری باتوں کو
اتنے خوب صورت لب جھوٹ کیسے بولیں گے
.....
عدم

عمر خیام

عمر خیام (ترجمہ)
نوجوانی کے عہدِ رنگیں میں
جز مےِ ناب اور کیا پینا
ایک ہی خاصیت ہے دونوں کی
تلخ ہے جام، تلخ ہے جینا

عطا شاد

پارساؤں  نے  بڑے  ظرف  کا  اظہار  کیا
ہمیں  سے  پی  اور  ہمیں  رسوا  سرِ  بازار  کیا

رات پھولوں کی نمائش میں وہ خوش جسم سے لوگ
آپ  تو  خواب  ہوئے  اور  ہمیں  بیدار  کیا

درد  کی  دھوپ  میں  صحرا  کی  طرح  ساتھ  رہے
شام  آئی  تو  لپٹ  کر  ہمیں  دیوار  کیا

کچھ  وہ  آنکھوں  کو  لگے  سنگ  پہ  سبزے  کی  طرح
کچھ  سرابوں  نے  ہمیں  تشنۂ  دیدار  کیا

سنگساری  میں  تو  وہ  ہاتھ  بھی  اٹھا  تھا  عطاّ
جس  نے  معصوم  کہا  جس  نے  گنہ  گار  کیا

عطاّء شاد

حمایت علی شاعر

( حمایت علی شاعر)
تجھ کو معلوُم نہیں، تجھ کو بَھلا کیا معلوُم !
تیری زُلفیں، تری آنکھیں ، ترے عارض، ترے ھونٹ
کیسی انجانی سی معصُوم خطا کرتے ھیں
اتنا مانوس ھے تیرا ھر اِک انداز کہ دِل
تیری ھر بات کا افسانہ بنا لیتا ھے
ترے ترشے ہوئے پیکر سے چُرا کر کچھ رنگ
اپنے خوابوں کا صنم خانہ سجا لیتا ھے
خلوتِ بزم ہو یا جلوتِ تنہائی ہو
ترا پیکر مِری نظروں میں اُتر آتا ہے
کوئی ساعت ہو، کوئی فکر ہو، کوئی ماحول
مجھ کو ہر سمت تِرا حُسن نظر آتا ھے
چلتے چلتے جو قدم آپ ٹھٹھک جاتے ھیں
سوچتا ہوں کہ کہیں توُ نے پُکارا تو نہیں
گمُ سی ہو جاتی ہیں نظریں، تو خیال آتا ھے
اِس میں پنہاں تِری آنکھوں کا اِشارہ تو نہیں
جانے اِس حُسنِ تصوّر کی حقیقت کیا ھے
جانے ان خوابوں کی قسمت میں سحر ھے کہ نہیں
جانے تو کون ھے، میں نے تجھے سمجھا کیا ھے
جانے تجھ کو بھی مِرے دل کی خبر ھے کہ نہیں !
تجھ کو معلوُم نہیں، تجھ کو بَھلا کیا معلوُم !
تجھ کو معلوم نہیں ، تجھ کو بھلا کیا معلوم !!

احمد ندیم قاسمی

اپنی آواز کی لرزش پہ تو قابو پا لو
پیار کے بول تو ہونٹوں سے نکل جاتے ہیں
اپنے تیور بھی سنبھالو کہ کوئی یہ نہ کہے
دل بدلتے ہیں تو چہرے بھی بدل جاتے  ہیں

انور مسعود

اب کہاں اور کسی چیز کی جا رکھی ہے
انور مسعود
اب کہاں اور کسی چیز کی جا رکھی ہے
دل میں اک تیری تمنا جو بسا رکھی ہے

سر بکف میں بھی ہوں شمشیر بکف ہے تو بھی
تو نے کس دن پہ یہ تقریب اٹھا رکھی ہے

دل سلگتا ہے ترے سرد رویے سے مرا
دیکھ اب برف نے کیا آگ لگا رکھی ہے

آئنہ دیکھ ذرا کیا میں غلط کہتا ہوں
تو نے خود سے بھی کوئی بات چھپا رکھی ہے

جیسے تو حکم کرے دل مرا ویسے دھڑکے
یہ گھڑی تیرے اشاروں سے ملا رکھی ہے

مطمئن مجھ سے نہیں ہے جو رعیت میری
یہ مرا تاج رکھا ہے یہ قبا رکھی ہے

گوہر اشک سے خالی نہیں آنکھیں انورؔ
یہی پونجی تو زمانے سے بچا رکھی ہے

عبید اللہ علیم

عزیز اِتنا ہی رکھو کہ جی سنبھل جائے
اب اِسقدر بھی نہ چاہو کہ دَم نِکل جائے
ملے ہیں یوں تو بُہت ، آئو اب مِلے یوں بھی
کہ روح گرمئِ انفاس سے پگھل جائے
محبتوں میں عجب ہے دِلوں کو دھڑکا سا
کہ جانے کون کہاں راستہ بدل جائے
رہے وہ دِل جو تمنائے تازہ تر میں رہے
خوشا وہ عمر جو خوابوں ہی میں بہل جائے
میں وہ چراغِ سرِ راہگزارِ دُنیا ہوں
جو اپنی زات کی تنہائیوں میں جل جائے
ہر ایک لحظہ یہی آرزو ، یہی حسرت
جو آج دِل میں ہے وہ شعر میں بھی ڈھل جائے

اسد ملتانی

اِن عَقل کے بَندوں میں آشفتہ سَری کیوں ہے
یہ تَنگ دِلی کیوں ہے یہ تنگ نظری کیوں ہے

اسرار اگر سمجھے دنیا کی ہر اِک شے کے
خود اپنی حقیقت سے یہ بے خبری کیوں ہے

سو جلوے ہیں نظروں سے مانندِ نظر پِنہاں
دعوائے جہاں بینی اے دیدہ وَری کیوں ہے

حَل جن کا عَمل سے ہے پیکار و جَدل سے ہے
ان زِندہ مسائل پر بحث نظری کیوں ہے

تُو دیکھ ترے دِل میں ہے سوزِ طلب کِتنا
مَت پوچھ دُعاؤں میں یہ بے اَثری کیوں ہے

اے گُل جو بہار آئی ہے وقتِ خود آرائی
یہ رَنگِ جُنوں کیسا یہ جامہ دَری کیوں ہے

واعظ کو جو عادت ہے پیچیدہ بیانی کی
حیراں ہے کہ رِندوں کی ہَر بات کَھری کیوں ہے

مِلتا ہے اِسے پانی اَشکوں کی رَوانی ہے
معلوم ہوا کھیتی زَخموں کی ہَری کیوں ہے

الفت کو اَسد کتنا آسان سمجھتا ہے
اب نالۂ شب کیوں ہے آہِ سحری کیوں ہے

کلام اسد ملتانی